Umengemeli uvele wabanda kunokuthi akhiphe amangwevu
LISUNGULWE NGOWE-1903
KWAZI ngisho ingane ukuthi iNingizimu Afrika igajwe yinqwaba yezinkinga, iningi lazo elingaxazululwa kuphela yizinqumo zikahulumeni eziphusile, ngakho kuyamangaza ukuthi uMengameli Cyril Ramaphosa, enkulumweni yakhe ngeledlule, ngesimo sezwe (State of the Nation Address), wasebenzisa leli thuba ukukhankasela iqembu lakhe njengoba ukhetho lukazwelonke seluseduze. Okwakulindelekile enkulumweni kamengameli wukuba atshele izwe ukuthi zinyathelo zini uhulumeni wakhe ozozithatha kulo nyaka ophezulu ukuxazulula izinkinga zethu. Esikhundleni sokwenza lokho, washayela ihlombe umsebenzi kahulumeni wakhe we-ANC kule minyaka ewu-30 uKhongolose ulawula izwe.
Ngisho nodaba lokuxazululwa kwenkinga kagesi umengameli owathi sekuntwela ezansi ngalo, waphaphalaza ngoba ngabo ubusuku benkulumo yakhe, i-Eskom yabika ukwanda kwezinkinga, yandisa isikhathi sikagqamcishi, kumanje sihleli ebumnyameni amahora amaningi.
Empeleni inkulumo kamengameli yayizwakala sengathi ngeyomuntu ovalelisayo, njengoba wasebenzisa iSona ukugcizelela “okuhle” uhulumeni wakhe neqembu lakhe “abakwenzele” abantu baseNingizimu Afrika, wangaqhamuka namasu amasha okufukula izwe. Akashongo lutho nangezinkinga uhulumeni owehlulekile ukuzilungisa, ingasaphathwa ke eyokuxolisa kubantu ngokuba yizahluleki kukahulumeni.
Wayezwakala njengomuntu oseqoqe yonke imithwalo yakhe emahhovisi ombuso, oseyindlela. Wayengazwakali njengomuntu osazimisele ukuqhubeka asihole, onamasu okuxazulula izinkinga ezikhungethe izwe.
Njengoba kuzoba nokhetho ezinyangeni ezimbalwa, kungenzeka mhlawumbe ukuthi uhlose ukukhipha amangwevu emuva kokhetho, uma esethula inkulumo yakhe yokubuya ihlandla lesibili.
Uma abeluleki bakamengameli bamcebisa ngokuthi angasho lutho olutheni kule nkulumo yakhe yangeledlule, akalinde ukuvulwa kwephalamende elisha emuva kokhetho, kungenzeka ukuthi benza iphutha, ngoba phela ikusasa kalaziwa.
Iqiniso wukuthi kumapeketwane ezweni, ngakho bambalwa abantu abangafunga bagomele ukuthi uKhongolose uzohlabana, ukwazi ukubusa izwe wodwa emuva kokhetho, njengoba kade wenza kusukela ngo-1994.
Empeleni kunezinkomba eziqinile zokuthi kungenzeka uhulumeni olandelayo ubunjwe yinhlanganisela yamaqembu kuzwelonke, nasezifundazweni iKwaZulu-Natal, neGauteng, lapho i-ANC isiphathe yodwa uhulumeni iminyaka eminingi.
Ijabhisile inkulumo kamengameli, esikhathini lapho abantu bebelindele ukuba asitshele ukuthi yini eyahlukile uhulumeni wakhe ozoyenza kulo nyaka ukusikhipha osizini.