UMCULI KAMASKANDI UXWAYISWE NGODUMO
UXWAYISWE phambi kwesizwe ngokuthi angalusebenzisi kabi udumo lwakhe umculi kamaskandi uScebi “INkosi Yamagcokama” Dlamini waseDungamanzi, eMsinga.
Utshelwe lokhu ngeSonto ngesikhathi enzelwe umcimbi wokumhalalisela ngokuhlomula indondo yeBest Traditional Masikandi and Digital Artist kumaSouth African Traditional Music Achievements Awards (Satma) anyakenye kuZibandlela (December).
Lo mcimbi uwenzelwe yiNdlunkulu yesizwe samaChunu, eMsinga, iNkosi uNgangendlovu Mchunu njengoba edabuka ngaphansi kwaso. Inkosi ithe udumo lwakhe alusebenzise ngendlela efanele kungafiki isikhathi sokufa kubikwe ukuthi ubengasenayo imali. Inkosi ikhuze nokuthi aqaphele isifazane nabangani ababi.
“Simkhuthaza phambi kwesizwe njengoba abantu besamthanda. Kufanele ayisebenzise kahle imali ayizuza ngomculo ngoba ngelinye ilanga abantu bayohlehla emculweni wakhe sekufike abanye abayobe bethandwa.
“Lo mcimbi ngowokubonga uNkulunkulu ngesipho esikhulu asiphe sona ngalo mfana wakwaDlamini. Yingakho sibone kukuhle ukumbonga ngale ndlela izwe elimazi ngayo,” kusho iNkosi.
Ithi ngesikhathi ewine le ndondo lomculi ngoZibandlela, ucele ukufika ebukhosini ayethulele yona inkosi. Ithi ngenxa yokuthi nayo kuyijabulisile ukunqoba kwakhe, ibone kukuhle ukuba ibize zonke izinduna zayo zibe yingxenye yomcimbi.
IMeya yaseMsinga uMnu Felinkosi Sikhakhane, ithi bawesekile lo mcimbi ngenxa yokuthi umkhandlu wenkosi ufake isicelo. Ithe bafuna nabaculi abasebancane bakule ndawo bakhuthazeke ngamakhono abo.
“Asiqali-ke namhlanje ukukhuthaza amaciko ngoba nakwiNdidane sake sayenzela umcimbi siwumasipala. Sifuna uMsinga ushintshe ngenxa yentsha esinayo njengamanje, kuphele umlando wezibhamu,” kusho imeya.
INkosi Yamagcokama ithi ukuhalaliselwa ebukhosini kusho lukhulu kuyona. Ithi emlandweni walesi sizwe, kuyaqala ukwenzelwa komculi umcimbi onjena.
“Ngesikhathi ngiwina indondo, ngifikelwe wumcabango wokuthi ngiyihambise enkosini ngoba bengiqala ukuwina nakuba ukuqokwa bekungaqali. Inkosi yathi makwenziwe umcimbi ukuze nabanye abaculi abasafufusa abangaphansi kwesizwe sayo, bezothola ithuba lokuzimaketha, kwakheke nesithombe sokuthi ikhono liyaphumelelisa,” esho.