‘Bebeye enyangeni’ abesifazane abatholwe sebebulwe
Kuthiwa bebeyolanda imali abayikhokhela ukuthwala njengoba ‘abakwethenjiswa bekungenzeki’
KUSOLWA umbango wemali obekumele ikhokhelwe abesifazane ababili, izidumbu zabo ezitholwe zindindilize ezaleni eMachobeni, eNanda, ngoLwesihlanu.
Kusolwa umbango wemali elinganiselwa ku-R200 000 “ebikhokhelwe inyanga ukuze izobathwalisela ukuceba” uNkk Nokuthula Jeza nendodakazi yakhe uNkz Thembelihle Jeza, abatholwe sebebulewe.
Le mali kuthiwa bebeyibanga nowesilisa oyinyanga okuthiwa bamkhokhela yona ngemuva kokuba uNkk Jeza ephunyelwe yimali yokushona komyeni wakhe owayeyisosha.
“Inyanga lena bekwaziwa ukuthi ngeyabo, basebenzisa yona ngoba nangelanga abagcinwa ngalo, babeshilo ukuthi baya kuyona.
“Kubonakale ngezithombe zezidumbu zabo sezisabalele ezinkundleni zokuxhumana, kufunwa abantu abangaba yizihlobo,” kusho umthombo weLANGA.
Kubikwa ukuthi laba bobabili bebegcine ukubonakala ngoLwesine ekuseni beya kule nyanga yabo, njengoba bese befuna iyibuyise le mali ngoba konke eyayithe kuzokwenzeka uma isibathwalisile, bekungenzeki.
“Ngelanga abahamba ngalobabeyolanda yona le mali ngoba bebekhala ngokuthi ababekuthenjisiwe bekungenzeki, sebefuna imali ibuye.
“Nangosuku abagcine ukubonakala ngalo babeshilo ukuthi bayohlangana nayo (inyanga) njengoba sebetholwa bebulewe,” kusho umthombo.
UNkk Jeza ube semehlweni abezindaba ngemuva kokuba nomdonsiswano phakathi kwakhe nomndeni womyeni wakhe uMnu Bongani Jeza ngoMfumfu (October) ka-2021.
Umndeni wakwaJeza wahamba waze wayofika enkantolo, wenqaba ukuba angcwabe umyeni wakhe, umsola ngokuthi kukhona okushaya amanzi ngokufa kwakhe.
Odadewabo kamufi batshela leli phephandaba, ukuthi kabafuni ukuba kugcwatshwe isidumbu somfowabo, ingakabuyi imiphumela yolibofuzo.
UNkz Hlengiwe Qwabe, ongudadewabo kaJeza, waze waveza ukuthi sebechithe imali elinganiselwa ku-R50 000, bekhokhela udokotela ozimele ukuze kuhlolwe isidumbu somfowabo ngoba bethi kabayikholwa incazelo uNkk Jeza ayebanika yona.
Okunye ababekhala ngakho wukuthi uNkk Jeza wayelwa, engafuni ukuthi sidumbu sihlolwe.
Baphinde bakhala nangokuthi eshonile umfowabo, kabazange babikelwe njengomndeni ngokufa kwakhe.
Ushona nje uNkk Jeza, yena nomndeni womyeni wakhe bebesayinkukhu nempaka.
ILANGA lithinte ilungu lo mndeni wezisulu, uNkz Pinky Mbambo, elivele lakhihla isililo, lathi kalikwazi ukukhuluma.
Isoka likaNkk Jeza elingatholakala igama lalo lithe walifonela ngalo usuku abanyamalala ngalo, ngoLwesine ekuseni, elibikela ukuthi sebefikile emzini wenyanga.
Lithe inyanga yayimbizile ukuba azolanda imali yakhe.
Lithe lize labona ezinkundleni zokuxhumana ngoLwesihlanu sebebulewe.
Okhulumela amaphoyisa uLt-Col Robert Netshiunda, uthe abesilisa abane abebesolwa ngokuthinteka kulesi sigameko sokubulawa kwalaba besifazane badubulane namaphoyisa, bashona ngoMgqibelo.
Uthe kukholakala ukuthi abasolwa bebesendleleni eya enyangeni eMpophomeni “beyogezwa” ngesikhathi bemiswa ngamaphoyisa.
Esitatimendeni esithunyelwe, uveze ukuthi abasolwa yibo abaqale badubula bebhekise emaphoyiseni, nawo aphindisela.