USUNGENE EZIKWELETINI UMNDENI WOWESILISA ‘OTHUNJIWE’
UHLELI ebumnyameni obungenafu umndeni wakwa Chonco, eMbhoshongweni, oLundi, osekuphele amasonto amathathu kwathunjwa ilungu lomndeni wawo, uMnu Fundabantu Chonco (24).
Kuvela ukuthi uChonco wathunjwa ngabantu abayisihlanu ababehamba ngemoto ebusuku.
ILANGA likhulume noMnu Hlanganani Chonco (29) olitshele ukuthi sekuyophela isonto lesine enyamalele, engaziwa umfowabo ukuthi ukuziphi izinkalo.
Uthe nombiko abawuthola kumuntu owathunjwa ehamba naye kawubagculisi, kunemibuzo engaphenduleki.
“Umfowethu ubehlala eThokoza, oLundi, lapho eqashe khona ngenxa yokusondelela etohweni lakhe. Ubesebenza esitolo esikhona kule ndawo.
“Uma sizwa ngomfana owathunjwa ehamba naye, uthi ngesikhathi umfowethu ephuma etohweni, wafonelwa yile nsizwa imcela ukuba ayiphathele iphepha lokugoqa insangu nesiphuzo esibandayo.
“Ngesikhathi umfowethu esebuya etohweni wadlula komunye umuzi.
“Lo muntu wabe esemfonela emtshela ukuthi uzomhlangabeza ukuze athole lezi mpahla ayemphathise zona.
“Sebendawonye uthi yilapho kwaqhamuka khona abantu abayisihlanu, bababuza ukuthi bayabazi yini.
“Uthi labantu babaqhuba ngemoto
ngokwehlukana, behamba bexoxa naye lo wakithi kodwa uthi akezwanga ukuthi babexoxa ngani, kwaze kwaba bamfaka emotweni bahamba naye, yena bamdedela.
“Okusixaka kakhulu le nto yenzeke kuwuMgqibelo kodwa umfana uze wasibikela ngeSonto.
“Ubethuleleni sonke lesi sikhathi engabiki ngokuthunjwa komfowethu?
“Nangesikhathi lo sebemdedele kabazange bamphuce ngisho umakhalekhukhwini wakhe, obekungenzeka awusebenzise ukuhlaba umkhosi ngokushesha.
“Konke lokho kuyasixaka,” esho.
Uthi umndeni wakhe usuvele ngekhanda ezikweletini, uzama ukuthungatha ilungu lawo.
“Kusukela edukile siyehla siyenyuka siya kubantu abahlolayo, siye kobheka emakhazeni nasenzindaweni ezahlukeke.
“Ibalelwa ngaphezulu kukaR10 000 imali esisetshenzisiwe, kucingwa. Sicela uma kukhona onolwazi aselekelele,” kucela uChonco.
Kuze kwashaya isikhathi sokushicilela okhulumela amaphoyisa KwaZulu-Natal uCol Robert Netshiunda, engayiphendulile imibuzo athunyelelwe yona mayelana nalolu daba.