OFISHI ABANCANE BASONGELA ISUNDOWNS KOWENDEBE
SISONGELA izingqungqulu ezihlonishwa i-Afrika yonke isikhulu sekilabhu egijima kwiMotsepe Foundation Championship (MFC), njengoba sitonyulwe nazo emqhudelwaneni weNedbank Cup okubhekwe ukuba uqale ngegiya eliphezulu.
I-NB La Masia izogadulisana neMamelodi Sundowns koweLast 32 yeNedbank Cup kusasa ngoLwesibili ngo-19h00 eDobsonville Stadium, eSoweto.
IDowns kubhekwe ukuba izigwazele ibhece kule kilabhu njengoba kwaziwa ukuthi kayiwabheki la makilabhu adlala esigabeni esiphansi kunesayo uma ibhekene nawo kulo mqhudelwano.
Okungasoze nje kwakhohlakala yimbudlu eshaye ngayo iPowerlines ngo-2012 iyibhubhisa ngo-240.
URashid Toffie oyisikhulu esiphezulu kwiLa Masia, uthi bazoyimangaza iSundowns. Ukusho lokhu emuva kokuba ezakhe zibambane ngo-0-0 neJDR Stars koweligi ngoLwesihlanu ntambama eDobsonville Stadium.
“Sikuqonda kahle ukuthi kasinikwa lutho kulo mdlalo njengoba sidlala esigabeni esiphansi kuneseSundowns. Abantu kuzofanele bangakhohlwa wukuthi kuke kwenzeka sakubona kuwona lo mqhudelwano uDavide ehlula uGoliath.
“Nathi sizokwenza lokho ngoba kabasazi kanti thina sibazi njengoba sizazi. Banabadlali abaseqophelweni eliphezulu impela kodwa sibabonile lapho bebuthaka khona. “Bagade ngoba singase sizobamagaza kulo mdlalo,” kusho uToffie ngokukhulu ukuzethemba.
ISundowns kuthiwa kayiwuthathi neze kancane lo mdlalo njengoba yazi ukuthi la makilabhu adlala esigabeni esiphansi avamisile ukwehlisa isithunzi samakilabhu adlala esigabeni esiphakeme ngokuwawashisa ijezi.
Kuthiwa iSundowns ibithumele izinhloli emdlalweni wale kilabhu neJDR ngoLwesihlanu.
Kuthiwa umqeqeshi uRulani Mokwena uvele usematasa namalungiselelo okuthi bazoyibhuquzisa kanjani le kilabhu.
Nokho kuthiwa kungenzeka abophele abadlali abangavamisile ukuthola isikimu ukubanika ithuba lokuzibonakalisa nokulula imisipha.