Uthi ukulungele ukuhola iKwaZulu-Natal uPappas
UTHI sekuyisikhathi sokuthi abantu baKwaZulu-Natal bakhiphe i-ANC esikhundleni, uMnu Chris Pappas (33) weDA, eveze ukuthi izogadla ngaye okhethweni, kwabangahola lesi sifundazwe.
Lokhu ukusho engxoxweni ekhethekile naleli phephandaba, lapho ethe izakhamizi sekufike isikhathi sokuthi zisebenzise inkululeko yentando yeningi ezayithola ngo1994, zikhethe uhulumeni onozwelo nobeka abantu phambili.
Uthe kuyinto engephikwe neyaziwayo ukuthi uhulumeni we-ANC, uhlulekile ukusebenzisa amandla onikezwe wona, kunalokho le nhlangano isebenza ngokuzicebisa yona.
Ebuzwa ukuthi yini angayilungisa uma esemandleni uthe, okubalulekile manje wukuthi kube nohulumeni okhathalela abantu, ongakhathaleli ukukhulisa inhlangano kuqala.
“Okokuqala nje okungalungile wukuthi uhulumeni we-ANC usemandleni ngoba ufuna ukusebenzela inhlangano, hhayi abantu. Yona (i-ANC) iphinde isebenzise amandla enikwe wona ukunikezela ngezikhundla ebantwini bayo abasuke bengakulungele nokuba kulezo zikhundla bese behlulwa wumsebenzi,” esho.
Uthi liphezulu izinga lentsha engasebenzi, yingqalasizinda eshabalalayo, enganakekelwa, ubugebengu obuphezulu nohulumeni onuka phu inkohlakalo.
“Ukhetho esiya kulona kaludingi ukuthi ubheke ibala lomuntu omvotelayo, kepha ludinga ukuthi lowo ombeka emandleni uzokwenza yini impilo yakho ibe ngcono nokuthi lukhona yini ushintsho angalwenza,” kusho uPappas.
Uthi iDA lapho iphethe khona, isikhombisile ukuthi iyabakhathalela abantu futhi uma isemandleni isuke ingangenele ukuzicebisa, kepha ukuqhubeka nokubhala umlando omusha wokunakekela abantu baseNingizimu Afrika, ngokushintsha impilo yabo nangokunikezelwa ngezidingo ezibafanele.
“Umzekelo nje, isifundazwe iWestern Cape, sibalwa nezinye ezenza kahle. Idolobha iCape Town, ngelinye lamadolobha abatshazwa ngokwenza kahle nokuheha abatshalimali nezivakashi okuholela ekutheni kukhule umnotho walo.
“KwaZulu-Natal i-ANC ihlulekile, khona kunjalo isafuna ukugadla ngoMnu Sboniso Duma onguNgqongqoshe wezokuVakasha, ukuThuthukiswa koMnotho nezeMvelo, kodwa lo mnyango uyahluleka ukwakha amathuba emisebenzi.
“Yini-ke angakwazi ukuyenzela isifundazwe?” kubuza yena.
UMnu Pappas uke waba yikhansela ku-ward 1, ngaphansi kukaMasipala iTheku. Uma ebuzwa ngokonakele kulo masipala akananazi, ukhomba ngqo uMnu Mxolisi Kaunda, oyiMeya. Uthi uthanda ukugqama nodumo ngaphezu kokusebenzela abantu.
“ITheku linuka phu inkohlakalo, liphinde libe nemeya nobuholi obuthanda ubumnandi okudlula ukuthanda intuthuko. Nedolobha libolile.
“Ingqalasizinda kayilungiswa, ubugebengu buphezulu kodwa kayikho imicimbi yobumnandi engaxhaswa esikhundleni sokuyiswa kwezidingo ebantwini,” esho.
Uthi lesi ngesinye sezizathu esenza iDA ihluleke uma iphakamisa ukuthi umkhandlu weTheku mawuhlakazwe, kuqalwe kabusha.
“Amakhansela e-ANC acabangela izisu zawo, okwenza ahlangana namakhansela amaqembu amancane angafuni kuhlakazwe umasipala. Akukhona ukuthi kabakuboni esikushoyo, yingoba bakhathalele izisu zabo nezikhundla,” esho.
Muva nje uNdunankulu wesifundazwe, uNkk Nomusa Dube-Ncube, naye usanda kugadla kuMnu Pappas, ethi umasipala awuholayo uMngeni, kawumsulwa njengoba abantu becabanga, nakuwona ikhona inkohlakalo.
“UNkk Dube-Ncube uvele angiphoxe nje yena ngoba bengimthanda futhi ngimeseka njengomuntu wesifazane obekwe esikhundleni sobundunankulu.
“Ngesikhathi eqokwa, ngamtshela ukuthi leli yithuba lokuziveza njengoba emele imbokodo, akhombise ukuthi abesifazane kakukho abangeke bakwenze.
“Ngiyayazi ingcindezi asebenza ngaphansi kwayo. Ngivele ngihleke nje uma esekhuluma ngenkohlakalo eMngeni kodwa engabukhiphi ubufakazi bayo. Thina inkohlakalo esisuke sikhuluma ngayo sinobufakazi bayo,” kusho yena ehleka.
Ebuzwa ngokuqokwa nokwethenjwa yiqembu lakhe ukuthi nguye ozolimela kuhulumeni wesifundazwe, uPappas uthi lona wumthwalo awamukela ngezandla zombili.
“Uma iqembu libone kungifanele ukuhamba phambili kulesi sifundazwe, umsebenzi esiwunikwe ngabantu siyowenza ngokuthembeka. Yisikhathi sokuthi abantu baKwaZulu-Natal bathole uhulumeni ozikhathazayo ngabo, kodwa lokhu kudinga ukuthi bona babe nesibindi, basebenzise inkululeko abayinikwa bavote ngobuhlakani,” esho.
Uthi ngoba wakhetha ukusebenzela umphakathi, uyaye angamangali kakhulu uma kuhlaselwa uphathina wakhe, kodwa angakufuni wukubhecwa, kungcoliswe igama lakhe ngezinto ezingekho.
UMnu Pappas uthi akuyona into ayivumela ihlale kakhulu engqondweni yakhe ukuhlaselwa kosopolitiki njalo uma kuyiwa okhethweni.
“Phambilini bengingagadwa, kodwa manje sengiyagadwa okuyinto evumelekile. Noma ngivuka ekuseni, kangibuswa wukuthi kumele ngigadwe ngoba ngiyakholelwa ekutheni uma usuku lokufa selungificile, ngeke ngilubalekele.
“Ngiyaqonda ukuthi isikhathi esikusona sinzima ngokwezepolitiki kodwa futhi impilo yami iyaqhubeka njengenjwayelo,” esho.
Uthi ukuba ngundunankulu omncane esifundazweni ngeke kumkhathaze ngoba noma yikuphi lapho ehamba khona, kujwayelekile ukuthi kube nguyena omncane.