Iyazethemba iDowns ngaphambi koweCaf
Uhlabeke umxhwele uMokwena ngezinga labadlali bakhe
UGEZEKE igilo ngebhola elidlalwe ngezakhe kwiNedbank Cup uRulani Mokwena oqeqesha iMamelodi Sundowns engenakho ukuphumula njengoba ibuyela ochungechungeni lwemidlalo yeCaf Champions League.
IDowns iqhathwe neFC Nouadhibou yaseMauritania kokaGroup A kwiChampions League ngoMgqibelo ngo-18h00 ekuhambeni.
AmaSandawana alifulathele elakuleli izolo ngoLwesithathu ntambama ebhekise amabombo eMauritania.
Ahamba nje ashiye ebhubhisile kuleli njengoba enenebule ngo-6-1 iNB La Masia koweLast 32 yeNedbank Cup ngoLwesibili ebusuku eDobsonville Stadium, eSoweto.
UGaston Sirino uqokwe njengomdlali ovelele njengoba eqhulule amagoli amathathu kulo mdlalo.
Amanye amagoli eDowns ashaywe nguMatias Esquivel, nguTerrence Mashego noLebohang Maboe. EleLa Masia kube yiphenathi eshaywe nguFuad Johnson.
Ekhuluma emuva kwalo mdlalo, uMokwena uthe: “Sidlale kahle kakhulu kulo mdlalo uma kuqhathaniswa nomdlalo esiphuma kuwona ne-Orlando Pirates ngeledlule.
“Abafana bami badlale kahle, bebephaselana kahle kanti namaphutha abe mancane kakhulu. “Yinto ebesiyidinga lena njengoba kuqala isikhathi soxhaxha lwemidlalo kithina. “Ukunqoba kwethu lo mdlalo kuzosisiza njengoba siqhubeka nemidlalo yeChampions League. “Kukhona konke lokho, ngiyayibongela le kilabhu ukuthi idlulele emzuliswaneni olandelayo weNedbank Cup,” esho.
* Ngawo uLwesibili ebusuku, iSuperSport United idlulele kwi-last 16 iwashisa ijezi iCape Town City ngo3-1 sekushaywa amaphenathi emdlalweni ophele kungu-1-1 eLucas Moripe Stadium. Emdlalweni olandelayo iSuperSport izobhekana neFuture yase-Egypt kokaGroup A kwiCaf Confederations Cup ngeSonto ngo-15h00 eLucas Moripe Stadium.