UMASKANDI UGXEKA IMICIMBI YEZINDONDO EWUBUKHAZIKHAZI
UPHUMELE obala, wagxeka ubukhazikhazi bemicimbi yezindondo engahlomulisi ngokugculisayo emacikweni.
Umculi kamasikandi uThokozani “Somnandi” Langa ubephawula ngoLwesihlanu ebusuku eShowe, kwethulwa ngokusemthethweni umncintiswano wamaSouth African Volunteers Awards (SAVA).
Uthe ngesikhathi eseyivukana, wayelindela izigidi zemali ngokuhlabana kwakhe ngezindondo kodwa kakubanga kanjalo. Ukhuthaze ukuthi imincintiswano yezindondo yehlise ubukhazikhazi, kwandiswe imiklomelo etholwa ngabaqokiwe nabanqobile. Uthi abahleli balemicimbi abayeke ukufuna ukubukwa ngobukhazikhazi bemicimbi ekubeni amaciko engathokozile.
“Asihlale kumaSava akhule nawo afane nezinye izindondo esezihlonishwa njengamanje. Engikuthandayo ngawo wukuthi abhekelela abantu abavolontiyayo benganakiwe emakhaya. Sesakhathala wubucwebecwebe, abantu befuna ukubukwa ezinkundleni zokuxhumana.
“Ngangizwa abantu bepikla ngisemncane emculweni, ngibona bethola izindondo ngicabanga ukuthi
lukhulu olutholwayo. Ngangilindele ama-million kodwa, kuthe sengifika kulezi zinto ngabona ukuthi ayikho yonke le nto, abantu bajabulela ukuwina indondo engahambi nalutho bese uzibuza ukuthi, kusizaphi.
“Ngikhuluma ngesipiliyoni enginaso ngoba zonke lezi zinto ngizitholile, amaSama, Satma, Amantshontsho, alukho uhlobo lwendondo engingenalo. Kungani kungancishiswa ubukhazikhazi?.
“Bonke abasaqhubeka nemicimbi yezindondo ngicela benze okungaphezu kokuthi imiklomelo ibemikhulu ngoba basuke besiza ubuqhawe nobunyoninco bamaciko,” kusho uSomnandi
Uphrojusa wohlelo lomculo kamaskandi oKhozini FM uNonhlanhla
“Mdonso” Ngcobo okunguyena umgqugquzeli walo mncintiswano wezindondo, uthembise ukuthi uzohambisana nemali kwabanqobile.
Uthi inhloso yamaSava, bekuwubonga abantu abasebenza ngokuzinikela bengabheke nzuzo. Uthi umehluko ngalo mncintiswano, wukuthi wona ugxile kubantu basemakhaya. Uthi bazobonga umsebenzi wamakhosi, iphoyisa lenduna nabanye.
Uthi ngokubuyisa lo mncintiswano, kufeza iphupho likamfowabo uMnu Bhekisisa Ngcobo (ongasekho).
Uthe ukuphakamisa igama lofisa aqokwe, ubhala umkhakha negama bese uthumela ku-45732.