KUSHONE ABAWU-9 BEBUYA EMCIMBINI WE-ANC ETHEKWINI
Lbhasi abebehamba ngalo ligingqike izolo ngeSonto ekuseni
KUSOLWA ukukhathala nobuthongo kumshayeli webhasi eligingqike izolo ngeSonto emgwaqweni u-R34, eDumbe ladlula nemiphefumulo ewu-9 yamalungu e-ANC.
Leli bhasi beliphuma emcimbini we-ANC wokwethulwa komqulu wezethembiso zokhetho obusenkundleni yezemidlalo iMoses Mabhida, lilibangise eSabelweni ngaphansi kwesiFunda iGert Sibanda, e-Ermelo, eMpu-malanga.
Ngaphandle kwabashonile kuvele ukuthi balinganiselwa ngaphezulu kuka-70 abalimele, baphuthunyiswa ezibhedlela.
Ngokusho komthombo ofike endaweni yesigameko, kunezinsolo eziqinile zokuthi umshayeli ubesekhathele futhi ehlaselwe wubuthongo.
“Ngithole ucingo olungibizela endaweni yesigameko ngezithuba zasekuseni ngeSonto, kuthiwa sekugingqike ibhasi elibuya emcimbini we-ANC.
“Ngifike ngazibonela abantu abashonile.
“Ngixhumane nezinhlaka zabosizo oluphuthumayo, saqala uhlelo lokuba sibaphuthumise ezibhedlela okungesaseDumbe nesaseVryheid.
“Sixhumene nabaholi be-ANC abagcine befikile ukuzonikezela ngosizo.
“Uma ubheka indawo okwenzeke kuyona ingozi, kusobala ukuthi umshayeli uhluleke
wukuyilawula ibhasi, okungenzeka ubesexinwe wubuthongo,” kusho umthombo.
I-ANC kuzwelonke ikhiphe isitatimende izwakalisa ukuzwelana nemindeni yezisulu. Ithe izolinda umbiko wophenyo lwamaphoyisa maqondana nembangela yengozi.
“I-ANC iyazwelana nemindeni yamalungu ayo aseMpumalanga ashone kule ngozi. Iqembu lijube iSekela likasihlalo weqembu eKZN, uNkz Nomagugu Simelane nabanye abaholi ukuba bayobheka isimo endaweni
yesigameko. Bazohambela nasezibhedlela okulaliswe kuzona abalimele.
“I-ANC ngeke iwukhohlwe umnikelo wala malungu aphangalele ngoba aficwe yilesi simo ebuya emcimbini obalulekile,” kusho isitatimende.
Okhulumela amaphoyisa kuzwelonke uBrig Athlenda Mathe, uthe ngokombiko otholwe ngamaphoyisa, kuvele ukuthi ibhasi eliginqikile beliphuma eMoses Mabhida, lilibangise esifundazweni iMpumalanga.