KUSHISWE ELINYE ITEKISI LAKWA-ZIMDOLLAR
KUBANJWE umoya ngempilo yomshayeli wetekisi yakwaBiyela, oBuka, eMpangeni ongeniswe egunjini labagula kakhulu ngemuva kokusinda ngokulambisa edutshulwa ngababulali emgwaqweni u-R34 ngoMgqibelo.
Isisulu sishayela enye yamatekisi kaMnu Vika Biyela ongumfowabo kaZimiphi ‘Zimdollar’ Biyela, ongumsakazi woKhozi FM.
Akusona isigameko sokuqala kuhlaselwa amatekisi kaBiyela; nangasekupheleni konyaka odlule kwashiswa awu-14.
UBiyela uthe umshayeli wakhe wehlelwe yilo mshophi eqeda ukwehlisa abantu abebeqashe itekisi ibahambise emcimbini wokwethulwa komqulu wezethembiso zokhetho ze-ANC, obusenkundleni yezemidlalo iMoses Mabhida, eThekwini.
Uthe umshayeli umchazele ukuthi uhlangane netekisi ebilayishe abantu abambalwa ingafakiwe i-number kuthe kusenjalo yaphenduka yadubula ibhekise kuyena.
“Uthe kuthe uma iphenduka le tekisi ahlangane nayo, wazama ukuyibalekela. Uthe kube sengathi iyedlula kanti bafuna ukumdubula kahle. Usinde ngokuthi aphume ngesicabha esingakwesokhohlo.
“Abahlaseli baqede ukuyidubula, bayishisa. Ngicabanga ukuthi bayishise bezitshela ukuthi umshayeli uphakathi kanti ubesephumile.
“Ubebambezelekile ngoba ubeqashiwe. Selokhu kwahlaselwa lapha ekhaya, ngabeka umthetho wokuthi wonke amatekisi kufanele abuye lingakashayi ihora lesihlanu ntambama,” kusho uBiyela.
Uthi akusona esokuqala lesi sigameko kuhlaselwa izisebenzi zakhe.
“Emasontweni amabili sekwenzeke izigaba ezintathu zokuhlasela lapha ekhaya, okubuhlungu wukuthi kuhlaselwa abantu abangisebenzelayo.
“Esokuqala, kusize ukuthi ngabafundisa ukuthi uma kunemoto oyisolayo ukuthi ingase ikunike inkinga, kufanele ungayivumeli ukuba ihambe ohlangothini lwangakwesokudla kube sengathi iyakwedlula.
“Nabo basinda kanjalo ngoba bebeqothwa ngenhlamvu emgwaqweni owuthelawayeka uN2. Ngolunye usuku kudutshulwe umakhenikha ongisizayo ngokulungisa izimoto zami. Nakhona lapho ngawabikela amaphoyisa kodwa angabopha muntu,” esho.
Uthi uyazi ukuthi inkulu impi ebhekiswe kuyena, kumzwisa ubuhlungu ukuthi kuzona zonke izigameko ezenzekile, akuboshwa muntu.
“Amaphoyisa ngiyawabikela ngazo zonke lezi zigameko kodwa kawabophi muntu. Ngiyawanika futhi namagama abantu abagila yonke le mikhuba yokucekela phansi izinto zami.
“Isono sami wukubiza abafana engihlobene nabo, ngabakhuza ukuba bayeke ubugebengu ngoba kukhalwa ngokuthi bathatha izimoto zikahulumeni ngenkani. Bathi kimi, mina ngikhulunyiswa wukuthi sengiphumelele empilweni.
“Mina bengibakhuza ngoba nginalo ulwazi lokuthi ubugebengu kabuphumelelisi kodwa kufanele benze into ezokwenza ukuthi baphile,” kusho uBiyela.
Okhulumela amaphoyisa KwaZulu-Natal, uLt-Colonel Nqobile Gwala, uthe amaphoyisa aseMpangeni aphenya icala lokuzama ukubulala nelokucekelwa phansi kwempahla.
“Kuvulwe icala lokuzama ukubulala kanye nelokushiswa kwempahla kulandela isigameko esenzeke emgwaqweni u-R34,” kuphetha uLt Col Gwala.