UPHENYO NGOHAMBO LUKACELE NOMKAKHE KWEYENDEBE YOMHLABA
IQEMBU eliphikisayo iDA, liveze ukuthi lizodlulisela ulwazi elilutholile ngohambo lukaNgqongqoshe wamaPhoyisa uMnu Bheki Cele lokuya eParis, eFrance ukuyobuka umqhudelwano womhlaba webhola lombhoxo iRugby World Cup.
Ngokubika kweNews24, lokhu kulandela ukuthi leli qembu likwazile ukuthola eminye imininingwane ngalolu hambo ngemuva kokufaka isicelo sokuthola ulwazi ngaphansi komthetho obizwa ngePromotin of Access to Information Act.
Kubikwa ukuthi ngoZibandlela (December) nyakenye ngemuva kokufaka imibuzo ePhalamende leli qembu lathola ukuthi uCele nesisebenzi sehhovisi lakhe, bahambela lo mqhudelwano ngokukhokhelwa yinkampani ezimele kodwa yangabakhokhela imali yomshwalene wokuhamba nemali ababezoyisebenzisa kulolu hambo.
Kubikwa ukuthi ephendula le mibuzo uCele waveza ukuthi umsizi wakhe wakhokhelwa ngemali yabakhokhi bentela kulolu hambo njengoba kwabiza u-R446 339.43.
Ngokwesitatimende esikhishwe yiDA, ithole ukuthi iwu-R184 528.43 imali eyakhishwa ukukhokhela amabhanoyi njengoba umsizi kaCele watetemuka, ehleli enda-weni yezicukuthwane.
Iveze ukuthi uCele nomkakhe nomsizi wakhe, balala ehhotela elisezingeni iMarriott Hotel elibiza ngaphezulu kuka-R20 000 ngobusuku.
Isitatimende seDA siphinde saveza nokuthi uCele nomkakhe bachitha imali engaphezulu kukaR2500 ngosuku, kwathi umsizi wakhe wadla u-R2 357 ngosuku.
Siqhuba ngokuthi abakhokhi bentela baphinde bakhokhela uCele, umkakhe nomsizi wakhe isamba semali engaphezulu kukaR167 000 ukuthi batetemuke njengezicukuthwane ngesikhathi beseParis.
NgoMasingana (January) nonyaka iDA iveze ukuthi uMvikeli woMphakathi wayazisa ukuthi izophenya ngohambo lukaCele kulo mqhudelwano.
Khona manjalo ngeledlule i-AfriForum iveze ukuthi izolufaka kuMvikeli woMphakathi udaba lwabalandeli ababili, uMama Joy Chauke noBotha Msila, okuvele ukuthi bakhokhelwa wuMnyango wezobuCiko namaSiko nezemiDlalo ukuyoba yingxenye yalo mqhudelwano.
Kubikwa ukuthi isiyonke imali yabakhokhi bentela eyasetshenziswa kulolu hambo ilinganiselwa ku-R250 000.