Usekubhaceni uthisha osolwa kwelokuqothwa komndeni
KUSOLWA omunye wothishanhloko basoNdini ngokubandakanyeka ekubulaweni komndeni wakwaMayise, eBasamlilo, oNdini, ngoMgqibelo, lapho kubulawe khona izelamani ezintathu ezingothisha nabazali bazo.
Ngokuthola kweLANGA ngemithombo yalo, lo thishanhloko ugcwele amathafa njengoba kuthiwa usezwile ukuthi amaphoyisa ayamthungatha.
NgoMsombuluko, ILANGA libike kabanzi ngokubulawa kukaMnu Mandlenkosi Mayise (66), uNkk Delisile Mayise (63), uNkz Phemile Mayise (36), uNkz Bongathini Mayise (34) noPhindile Mayise (29).
Ukubulawa kwalo mndeni kubhebhezele itwetwe emalungwini omphakathi waseBasamlilo, njengoba kuvele kunezigameko zokugobhoza kwegazi okuthiwa kazaziwa ukuthi zisukela kuphi.
Kuthiwa amaphoyisa abesewutholile umkhondo wabesilisa ababili kwelokubulawa komndeni wakwaMayise.
Imithombo ithi kuvela ukuthi kunemibango ezikoleni obekufundisa kuzona abafi.
“Kuyavela futhi ukuthi abazali bathelwe ngamachaphazelo,” kusho umthombo.
ILANGA
libike ukuthi kusukela ngenyanga edlule, bangaphezulu kweshumi abantu abesebebulawe kulesiya sigodi, osekuholele ekutheni abantu abaningi bashiye imizi yabo.
Leli phephandaba lihabule ukuthi bekungafundwa lonke leli sonto ezikoleni ezimbili eziseBasamlilo, ngoba abazali benengebhe ngezingane zabo kanti nothisha bayasaba ukuya esikoleni.
Okhulumela amaphoyisa KwaZuluNatal, uLt Col Nqobile Gwala, uthe uphiko lwamaphoyisa, iNational Intervention Unit (NIU), lungenelele ukuyophenya udaba lokubulawa komndeni wakwaMayise.
NgoLwesibili luthole imibiko ethi abasolwa bacashe esigodini iNayini, KwaSanguye, eMelmoth.
“Amaphoyisa alandele umkhondo, afica amadoda amabili angazange afune kuzwa lutho, avulela ngenhlamvu ebhekise kuwona, nawo adubula. Abasolwa ababili bashonele khona lapho endaweni yesigameko. Batholwe nezinhlamvu eziwu-24, omakhalekhukhwini abane, izibhamu okubalwa kuzo i-shotgun, yisibhamu sokuzakhela, yi-pistol ne-revolver.
Uthi amaphoyisa aphansi phezulu, alandela umkhondo womunye umsolwa othintekayo ngokubulawa komndeni wakwaMayise.