OKAMASKANDI UYAZISOLA NGOKUPHIHLIZA IZINDONDO
UZISOLA ngokuphihliza kwakhe izindondo ayezivotelwe ngabalandeli bakhe emincintiswaneni ehlukene eyedlule, umculi kamaskandi owashiya kumangelwe, ebonakala kwi-video eziphihliza ngesagila izindondo ayeziwinile.
UPhumlani “Mfezemnyama” Khumalo waseMadwaleni, eNquthu, uthi ngokuhamba kwesikhathi ubonile ukuthi imincintiswano yenza ukuthi umculi ahlale esematheni ebantwini. Uveze lokhu ephawula ngomncintiswano weQuantum ebekwe yiMother of All Maskandi Festival, ezokuba mhla ka-6 kuMbasa (April) ePeoples' Park, eMoses Mabhida Stadium.
Ngesonto eledlule ubelele isihlanu kubaculi abahamba phambili ohlwini oluqhudelanayo. Utshele ILANGA ukuthi le nto ayenza kayilungile.
“Bengibona kuwina nabantu engibahlulayo ngomculo, ngafikelwa wumuzwa wokuthi izindondo ziyathengwa. Sengibonile ukuthi kayikho impi, empeleni wumdlalo nje womaskandi, ohluliwe kufanele emukele. Ngakho-ke sengibuyile, azihlabane amalunda,” kusho uMfezemnyama.
Uthi okwenze wabuya kulo mncintiswano wukuthi kubekwe imoto okuyisiteki esibonakalayo. Ngesikhathi ephihliza izindondo zakhe, wayekhala ngokuthi akazange athole ngisho indibilishi yesenti ngokuziwina. Phakathi kwalezi zindondo, kubalwa eyamaSouth African Traditional Music Achievements Awards (Satma), Amantshontsho Kamaskandi Awards nezinye.
Kulo mncintiswano kuvezwe ukuthi umculi ozodla umhlanganiso ngeke avunyelwe ukuwungenela ngonyaka ozayo. UKhuzani neGcokama Elisha kabayona ingxenye yomncintiswano kodwa bazobe benandisa.
Umgqugquzeli walo mcimbi uMnu Eric Ngobe uthe, uKhuzani neGcokama sebezuze okuningi ngomculo wabo, kufanele kunikezwe nabanye abaculi ithuba. Uthe umculi ozolala isibili ngokwamavoti, uzokhokhelwa ngokuphindiwe imali yokunandisa ngosuku lokumenyezelwa konqobile.
Kuvotwa ngokuthumela igama lomculi enombolweni ethi: 44893. Uhlu lwabaculi abawu-30 abazobe behamba phambili ngevoti kuleli sonto, bazoshicilelwa kwiLANGA