OWASE-KZN UJABULELA UKUYOBHEKANA NABAGIJIMI ABANESIPILIYONI
UZIMISELE ngokugcina umgqigqo wakhe wokungena nabokuqala abathathu kwiSouth Africa National 10km Championships umsubathi waKwaZulu-Natal, uSiyabonga “Bongo” Ndlovu, weBlack Diamond (osesithombeni).
UNdlovu ungomunye wabasubathi abamele isifundazwe kulo mqhudelwano ozokuba ngeSonto eGoli.
Lo mjaho uyingxenye yeRace to Equality 21km ehambisana ne-10km SA Championships ne-5km fun run, uxhaswe yiMotsepe Foundation.
Izingqwele ze-half marathon zizohlomula u-R42 000 kubo bobubili ubulili kuthi abazongena endaweni yesihlanu bathole u-R10 000.
Izingqwele ze-10km zizothola u-R20 000 kubo bobubili ubulili kuthi abazongena endaweni yesihlanu bagoduke no-R4 000. Abaneminyaka ewu-40 kuya ku-60 bazothola u-R10 000 kuthi ku10km bazihlomulele u-R6000.
UNdlovu utshele ILANGA ukuthi kumjabulisile ukuqokelwa kwakhe eqenjini lesifundazwe.
“Nyakenye ngangena unombolo 3 kwiSA Champs eMpumalanga, nakulo nyaka ngingakuthokozela ukugcina indawo yami.
“Ngiyazi ukuthi lo mjaho uzokuba nzima njengoba kuzokube kukhona abasubathi abafana noPrecious Mashele noKabelo Mulaudzi.
“Kuyangithokozisa ukugijima nabo ngoba banesipiliyoni, sebeke bagijima ngisho phesheya kwezilwandle,” kusho uNdlovu ono-28:50 kwi-10km awenze kwiDurban International Marathon.
Lo msubathi uya kulo mjaho nje, usenqobe imijaho emithathu ye-10km selokhu kuqale unyaka; okuyiJoseph Shabalala eMnambithi, obuseRichards Bay nowaseMpumalanga.
UMandla Mngomezulu weKZNA, uthe iqembu abalithumele bayalethemba ukuthi lizokwenza kahle. Uthe unethemba lokuthi indondo bazobuya nayo.
Abanye abasubathi abayomela iKZN nguSiyabonga Ndlovu, uSibusiso Kubheka, uBongelani Mkhwanazi, u-Ayanda Ngcobo, uBusisiwe Chamane, uSimphiwe Zulu, uMichael Ndlovu, uMichael Zuma, uKaren Sobrino noPiet Brits.
Kusenjalo, abasubathi baKwaZulu-Natal bazogadulisana kuMngeni Water Marathon ngeSonto eHowick.
Lo mjaho ungomunye wokuzibekisela indawo kwiComrades Marathon kanti uzokube uhambisana ne-21km ne-10km. Abafuna ulwazi bangaxhumana noWerner Jonas kwethi: 083 376 7334.
AbeTrack & Field bazogadulisana emidlalweni yeKZN TVET College Athletics Champs ngoMgqibelo eKings Park Athletics Stadium, eThekwini.