BEBEBULALA INYOKA ABANTU KOWE-IFP
BEBEBULALA inyoka abalandeli namalungu eNkatha Freedom Party, abadele ilanga ebelikhipha umkhovu etsheni eThekwini, bezolalela uMengameli weqembu, uMnu Velenkosini Hlabisa, ethula umqulu wezethembiso zokhetho, izolo ngeSonto eMoses Mabhida Stadium.
Le nkundla emumatha abantu abangaphezulu kuka-70 000, beyigcwele phama, abalandeli baleli qembu abebebuthene abebephuma ezifundazweni ezahlukene. Ukhetho lukazwelonke nezifundazwe lukuzoba ngomhla ka-29 kuNhlaba (May).
Yize bekunandisa abaculi abehlukene kodwa bekuthi uma kuculwa izingoma zaleli qembu zomzabalazo, kusukume nesinedolo. Badilike ezitulweni abebehleli kuzona besabalala enkundleni ngesikhathi kutheleka ubuholi baleli qembu, buholwa nguMengameli walo, uMnu Velenkosini Hlabisa.
Ngaphambi kokuvulwa kwamasango eMoses Mabhida ngo-8 ekuseni, izinkumbi zabantu bese zimi ngaphandle, zilindele ukungena. Bezibonakala zihlomele ubude bosuku njengoba abanye bebezihlinzeke nangemiphako.
ILANGA likhulume nabanye abebevela ezindaweni ezahlukene abathe, kubona lolu suku lufana nesikhumbuzo somsunguli waleli qembu, uMntwana waKwaPhindangene, iNkosi Mangosuthu Buthelezi okhothame ngoMandulo (September) wangonyaka odlule.
Lona wumcimbi wokuqala waleli wembu wokwethula umqulu wezethembiso zokhetho engasekho uShenge. Ngaphambi kokugibela esiteji, uHlabisa ehambisana noMnu Thami Ntuli onguSihlalo we-IFP KwaZuluNatal, oqokwe yileli qembu ukuba alimele kwesikaNdunankulu KwaZulu-Natal, nobuholi obuphezulu baqale bazungeza inkundla kwachwaza.
UMnu Bonga Mchunu waseEstcourt, uthe usebe ngumlandeli waleli qembu iminyaka engaphezulu kuka-20, kanti kumfikisela ngezinyembezi ukubona abantu bephume ngobuningi.
“Ngisho itshalwa iNkosi yaKwaButhelezi, ngadela konke ngaya (khona). Kuyajabulisa ukuhlangana kanje. Ngiyethemba ukuthi nayo iyajabula lapho ikhona,” kusho yena.
UNkz Phephile Khanyile waseMthwalume, uthe uselinde kufike usuku lwamanqamu. “Angithi uyayibona indlovu ukuthi ingakanani. Sesijahe kufike usuku lwamanqamu, sikhombise uthando lwethu ngoMntwana waKwaPhingandene noma engasekho, ukuthi siyohlale simthanda,” esho.
Ngaphandle kwenkundla nakhona bekuphithizela abalandeli baleli qembu, bephuma bengena enkundleni.
Osomabhizinisi abancane bebedayisa umfaniswano waleli qembu ohlanganisa izigqoko, amabhayi nokunye.
Abebethengisa ngokudla nabo bagoduke behleka bodwa. Okunye okuqaphelekile kulo mcimbi wukuthi bewuhanjelwe kakhulu yintsha.
Umcimbi uvulwe ngeculo lesizwe, kwaphinde kwadlalwa nenoni lezingoma zikaMntwana uPrincess Magogo, ozala iNkosi uMangosuthu.
nonhlakaniphos@ilanganews.co.za