Ligcwele amathafa iphoyisa elilahlwe ngamacala okubulala
Kuthiwa licele empunzini liphuthunyiswa emtholampilo emuva kokukhala ngokungaphili
LIGCWELE amathafa iphoyisa eleqe evenini yozakwabo ngoLwesihlanu ngemuva kokulahlwa ngamacala amathathu okubulala yiNkantolo eNkulu yaseMgungundlovu. Lokhu sekudale ukuthi bayobhaca abesifazane abathathu abebengofakazi ecaleni ebelibhekene noLebohang Ndlovu (26) obeyiphoyisa esiteshini saseMgungundlovu.
Kubikwa ukuthi uNdlovu uthole intuba yokweqa ngemuva kokuba eqambe amanga, wathi uyagula enkantolo wabe esephuthunyiswa emtholampilo, okuyilapho eqe khona.
UNdlovu ulahlwe ngamacala amathathu okubulala, elokutholakala nesibhamu esingekho emthethweni nezinhlamvu. Ulahlwe ngamacala okubulala uMnu Bonga Ngubane, uMnu Mthokozisi Khumalo noMnu Bheki Jojo esigamekweni esenzeka ngoNhlangulana (June) 2022, eFrance, eMgungundlovu.
UNdlovu wazinikela emaphoyiseni ngemuva kokubulala laba. Wenza leli cala eneminyaka emithathu ejoyine umbutho wamaphoyisa.
NgoLwesine ngemuva kokuba elahlwe yicala, ube eseqala ukuzigulisa, ummeli wakhe wacela inkantolo ukuba imdedele ahanjiswe emtholampilo. Uphelezelwe yiphoyisa elilodwa engafasiwe ozankosi.
Kuthiwa uhanjiswe emtholampilo osenkabeni yedolobha uMgungundlovu okuthe lingazelele iphoyisa ebelimgadile, wacela empunzini wangena phakathi kweziguli namalungu omphakathi emtholampilo emuva kwalokho wangabe esabonakala.
Kubikwa ukuthi abafi babulawa ngemuva kokuba uNdlovu eshaye uNgubane ngebhodlela likabhiya
ngoba emsola ngokuthi akazimisele ukumkhokhela imali yakhe ayekade eyibolekile njengoba umsolwa ebengumashonisa owaziwayo endaweni.
Kuthiwa uNdlovu wafika izisulu ziphuza utshwala wafuna imali yakhe kuNgubane, owamphendula ngokuthi uzomlungisela imali yakhe okwakufanele ibuye isinenzalo.
Kuvela ukuthi uNdlovu wadinwa, washaya uNgubane ngebhodlela
okwathi uma uKhumalo noJojo bemkhuza, waphendukela kubona, wabatshela ukuthi usaya kubo uyolanda into yakhe azobaqondisa ngayo.
Kuthiwa wabuya esehamba nomfowabo nenja yakhe ayehlala ehamba nayo. Akakhulumanga, wafike wavulela ngenhlamvu kubona bobathathu bashonela endaweni yesigameko wase eyozinikela emaphoyiseni.
Umthombo osondelene nalolu
daba utshele ILANGA ukuthi kukhulu ukukhathazeka kofakazi njengoba bobathathu bengasalali emakhaya ngenxa yobungozi bomsolwa.
“Okushiya imibuzo wukuthi kungani ebengafasiwe ngozankosi umsolwa. Bobathathu laba besifazane balale esiteshini samaphoyisa ngoba besaba ukwenzekaliswa nguNdlovu,” kusho umthombo.
Okhulumela amaphoyisa KwaZulu-Natal
uLt-Colonel Nqobile Gwala uthe amaphoyisa aseMgungundlovu aphenya icala lokweqa kukaLebohang Ndlovu (26) ezandleni zomthetho ngoLwesine.
“Umsolwa wayekade eboshelwe amacala amathathu okubulala, elilodwa lokutholakala nesibh-amu esingekho emthethweni nezinhlamvu,” kuphetha uLt Col Gwala.