KUDUTSHULWE KWABULAWA INDUNA EMBUMBULU
engibuza ukuthi siphephile yini esitolo, uzwa kuqhuma izibhamu. Ngilandulile ngathi angizwanga lutho kodwa ngajikisa imoto ngabuyela khona esitolo.
“Ngifike ngazithela phezu kwesidumbu sakhe emotweni, bese kukhala ibhungezi esitolo. Ngendlela engibuke ngayo abamdubulile bebemcuthele esangweni.
Kubukeka sengathi baqale ukumdubula ephansi waze wangena ngaphakathi emotweni bamqedela khona.
“Abalelwa ku-30 amagobolondo ezinhlamvu atholakele endaweni yesigameko. Akukho lutho lwakhe oluthathiwe. Silimele kakhulu, ubaba ubeyikho konke kithina,” kuchaza indodana.
Indodakazi yenduna uNkz Zola Msweli (28) nayo ikhihle isililo ngoyise.
“Bengisekhaya, ngezwa ukuqhuma kwezibhamu, ngifonele umfowethu uMhlengi ngibuza ukuthi kwenzenjani, nakhu kuqhuma izibhamu esitolo, wathi akasekho esitolo. Ngimyalele ukuba angabuyeli esitolo ngokushesha ngoba kuyadutshulwa.
“Ngaleso sikhathi ubaba ubengasatholakali kolwakhe ucingo. Bengigcine ukukhuluma naye emizuzwini emihlanu, ngibuza ukuthi babuya nini, wathi useyavala. Emuva kwalokho kuqhume izibhamu kwaba wukuhlukana kwethu naye. Ubaba ubeyikho konke lapha ekhaya, esinakekela,” kubalisa uZola
ILANGA
likhulume neNkosi uHlengwa ezwakalise ukudumala ngokubulawa kwenduna.
“Ngibuhlungu emoyeni, ziningi izinhlelo ebesizihlela naye, sizozenza ngokubambisana. Besihlangene ngoMgqibelo odlule sizixoxela ngezindaba zesizwe. Akukho induna eyakubika okuhambisana nokungaphephi kwempilo yayo.
“Nayizolo (NgoLwesihlanu) ike yafona, saxoxa ngokuthile ebesihlela ukukwenza, ayizange ibike lutho olubi. Noma sekunje, ngizocela isizwe sidedele abomthetho kube yibo abazobhekana nalolu daba,” kuphetha iNkosi Hlengwa.
Umdidiyeli wamabutho uMhlabuhlangene uGobizizwe Makhanya, uthe sekuyinsakavukela umchilo wesidwaba ukubulawa kwezinduna eMbumbulu.
“Sizwakalisa ukukhala nokudabuka ngalesi sehlo esesiyinsakavukela sokugcwelezwa kwezinduna. Ngonyaka odlule singcwabe izinduna ezintathu, uMnu Walter Ngcobo wakwaThoyane, uMnu Ngubane waseSimbothimuni noMnu Squmfe Mkhize owangenelwa abantu emini kwabha, bethi bayocela inxiwa.
“Wathi uyabasiza bamthela othulini ngenhlamvu,” kubeka umdidiyeli.
Okhulumela amaphoyisa KwaZulu-Natal uLt-Col Nqobile Gwala, usiqinisekisile lesi sigameko, wathi amaphoyisa aseMbumbulu aphenya amacala amathathu, elokubulala, elokuzama ukubulala nelokweba isibhamu.