KUSOLWE IPOLITIKI NGOKUVINJWA KUKATHISHANHLOKO
SIVALWE wumbango wepolitiki isikole okuthiwa sekuphele amasonto amabili abafundi behleli emakhaya ngenxa yokuvinjwa kukathishanhloko omusha ukuba aqale umsebenzi wakhe.
Ngokuthola kweLANGA, kunamadoda angamalungu omphakathi okuthiwa avuka njalo ekuseni ayoqhinqa emasangweni esikole, avimbe ukufunda nokufundisa.
Kuvela ukuthi kawafuni uthishanhloko omusha ukuba asebenze kulesi sikole, amsola ngokuthi uyilungu likaKhongolose kanti obekade ephethe, osethathe umhlalaphansi kuthiwa ubeyilungu le-IFP.
USihlalo wenhlangano yabahlali baseZululand, uMnu Phohloza Zungu, uthi kubakhathaza kakhulu okwenzeka kulesi sikole.
Uthi kunamadoda avuka ekuseni ayophuza utshwala emasangweni esikole, avimbe uthishanhloko. Uthi le mpi eqhubekayo ilimaza ikusasa labafundi.
“Sifuna uhulumeni uthathe isinqumo ngalesi sikole, okungcono sivalwe, izingane zithuthwe ziyofunda kwezinye izindawo.
“Kuyaxaka ukuthi umphakathi uhlangana kanjani nokuqashwa kukathishanhloko ngoba lo muntu uphumelele ohlelweni lokuhlunga ozophatha isikole, akukho okubikwa ukuthi akwenzekanga ngendlela efanele.
“Le nto inenhlese yothisha abathile ngaphakathi abanezimfuno zabo, okuyibona abathengela amalungu omphakathi utshwala ukuze aphazamise ukufunda esikoleni,” kusho uZungu.
lithole ukuthi nangesikhathi ezokwethulwa ngokusemthethweni uthishanhloko esikoleni, bekugade amaphoyisa ngoba bese kuzwakele ukuthi umphakathi kawumfuni asebenze kusona. Kubikwa ukuthi uvinjwe engakaqali nokusebenza.
“Lo thisha olethwe kulesi sikole, yingane esencane efundisile nakulesi sikole eminyakeni edlule ngaphambi kokuba ithole amadlelo okuphatha kwesinye isikole.
“Kuyaxaka ukuthi ivinjelwani. Inkinga nje enkulu ngeyokuthi othisha bafuna ukuphathwa ngumuntu ozohluleka wukubagada ukuze benze umathanda wabo,” esho.
Uthi sebebhalele uNgqongqoshe wezeMfundo KwaZulu-Natal, uNkk Mbali Frazer ukuba angenelele.
Imizamo yokuthola isigungu sabazali kayiphumelelanga
Okhulumela uMnyango wezeMfundo esifundazweni, uMnu Muzi Mahlambi, uthi kuzophenywa okwenzeka kulesi sikole.
“Ukufunda kwabantwana yikhona okubaluleke kakhulu, ngakhoke izinkinga zabazali kakufanele zingenelele ekubaphazamiseni.
“Sizophenya ukuze umnyango uxazulule,” kusho uMahlambi.