Kuphakanyiswa imifaniswano engabuvezi ubulili bomfundi
KWEHLUKENE imibono ngesiphakamiso seSouth African Human Rights Commission (SAHRC), esemukelwe yikomidi loMnyango wezeMfundo ePhalamende ngeledlule, esithinta ukushintshwa kwemithetho yemifaniswano neyokulungiswa kwamakhanda abafundi ezikoleni zaseNingizimu Afrika.
I-SAHRC itshele iPhalamende ukuthi imifaniswano yabafundi egqokwa ezikoleni njengamanje icindezela ilungelo lesithunzi nelokulingana ngokobulili, futhi ithole izikhalo eziningi kubafundi, bekhala ngokungakhululeki ngenxa yendlela ekumele babukeke ngayo ezikoleni.
UDkt Eileen Carter, uveze ukuthi kuningi okumele uMnyango weMfundo ukulungise emthethweni othinta ukubukeka komfundi nomfaniswano ekumele awugqoke.
“Ukuphoqa lolu hlobo lwemifaniswano egqokwayo ezikoleni njengamanje kuwukucwasa okungafanele ngoba kwehlisa isithunzi somfundi, kuphinde kumephuce ilungelo lenkululeko yokuphumela obala ngobulili bakhe.
“Le mithetho yemifaniswano ihamba ize ifike ekuhlukumezeni ilungelo lemfihlo njengoba kwezinye izikole imifaniswano ihambisana nezingubo zangaphansi ekumele zigqokwe ngabafundi besifazane, kodwa kawukho onika abafundi besilisa okumele bakugqoke ngaphansi,” kusho uCater.
Uthi iSAHRC iphakamisa ukuthi kube nemifaniswano efanayo kubo bonke abafundi, engabudaluli ubulili (gender-neutral uniforms). Uthi ukugqokwa kwale mifaniswano kuzophinde kulekelele nasekwehliseni inani eliphezulu okuthengwa ngalo imifaniswano.
Inhlangano yothisha iNational Professional Teachers’ Organisation of South Africa (Naptosa) ebiyiyingxenye yekomidi ebelilalele lezi ziphakamiso, ithe lezi ziphakamiso zibamangazile.
Obemele le nhlangano uMnu Basil Manuel, uthi lolu wudaba okumele ludingidwe ngaphambi kokuphuma nesinqumo esithile. Uthi iSAHRC kumele ikuqonde ukuthi akuzoba lula ukushintsha lo mthetho.
“Le nto kayiyi ngokuthi abafundi besilisa bafuna ukugqoka okwabesifazane, kanjalo nabesifazane bafuna ukwenza okufanayo. Siyakuqonda ukuthi abafundi bafuna ukukhululeka, bangagqoki izingubo ezizobenza bazenyeze ngobubona.
“Nakuba kunjalo, kumele kube nezingxoxo ezijulile ezithinta ukwethulwa kwemifaniswano engabudaluli ubulili. Akulula ukushintsha imithetho nosiko lwesikole njengokusho kweSAHRC,” esho.
Uthi nakuba imifaniswano yesikole ibiza, izinyunyana zothisha noMnyango weMfundo eyisiSekelo kumele benze imizamo yokunciphisa amanani emifaniswano ukuze bonke abafundi bakwazi ukuyithenga. I-South African Democratic Teachers’ Union (Sadtu) ithe iyasemukela lesi siphakamiso.
UNobhala weSadtu KwaZulu-Natal, uNkz Nomarashiya Caluza (osesithombeni), uthe iSadtu isishayela ihlombe lesi siphakamiso ngoba bonke abafundi sebezokhululeka.
“Lokhu kuzolekelela abafundi ukuthi babe nokuzethemba ngobulili babo. Siyazi ukuthi bakhona abangazethembi kuyimanje okwenza kugcine kuphazamiseke ukufunda kwabo.
“Lokhu kuzokwenza bangazenyezi namalungelo abo angacindezeleki, okuchaza ukuthi nokufunda kwabo ngeke kusaphazamiseka. SiyiSadtu ukufunda kahle komntwana yikho esikubeke phambili,” kusho uNkz Caluza.