Usomatekisi ubopha ungqongqoshe wamaphoyisa
Ufuna ukunxeshezelwa ngokuboshwa ‘ngokungemthetho’
USOMATEKISI owaziwayo eThekwini namaphethelo, uMnu Thomas Getsemane, ufuna ukuba umbuso umnxephezele ngemali eyevile ku-R100 million, “ngokudicilelwa phansi kwesithunzi sakhe”, esigamekweni esenzeke ngasekupheleni konyaka odlule, lapho ethi uboshwe ngamaphoyisa ngokungekho emthethweni.
Lokhu kuvela emaphepheni afakwe eNkantolo eNkulu yaseMgungundlovu ngomhla ka-8 kwephezulu.
Kuvela ukuthi uGetsemane ubopha uNgqongqoshe wamaPhoyisa uMnu Bheki Cele, ngokuboshwa kwakhe nonogada bakhe abawu-11, ngomhla ka-3 kuLwezi (November), nyakenye.
Ngokuthola kwaleli phephandaba, uGetsemane – ophinde abe nenkampani yonogada – uboshwe esemayini iQala Quary, lapho kuvela ukuthi “wayeyolekelela” iNkosi uMqoqi Ngcobo, ngemuva kokuba imcelile ukuba azoyisiza kule mayini esesizweni sayo, okuthiwa kwangena kuyona osomabhizinisi abathile, “bayidla ngenkani”.
ILANGA like labika ekuqaleni kwalo nyaka ngembizo ebeyibizwe yiNkosi uNgcobo, lapho yayiyobikela khona isizwe sayo ngezinkinga ebhekene nazo ngemayini.
Yaveza ukuthi kufanele ngabe le mayini ihlomulisa isizwe sayo, kodwa kuhlomula abathile abayithathe kuyo ngenkani.
Inkosi yaveza nokuthi ngesikhathi kuboshwa uGetsemane, yakhathazeka ngoba yiyo eyayimcelile ukuba ayilekelele ngoba yase ikuzame konke, yaze yabiza namaphoyisa, ukuba kukhishwe laba abadla le mayini ngodli.
Ngemuva kokuboshwa kwakhe uGetsemane, wagcinwa esitokisini izinsuku ezine nabaqaphi bakhe, badedelwa bengavelanga ngisho enkantolo ngemuva kokuba abashushisi bethole ukuthi kabukho ubufakazi ngecala okwakuthiwa balenzile.
ILANGA liwabonile amaphepha afakwe ngabammeli bakaGetsemane, iNJ Attorneys, enkantolo, aveza ukuthi ukuboshwa kwakhe nonogada bakhe kwakukhombisa ukuthi kuhloswe ukuthi “kubukiswe ngaye”.
Abammeli baphinde bathi ngesikhathi eboshwa, kwakukhona ngisho nesikhulu esiphezulu samaphoyisa KwaZulu-Natal, futhi kwathathwa nezithombe zakhe, zabonakala sezisabalele ezinkundleni zokuxhumana.
Kule ncwadi abammeli balo somatekisi baphinde bakhale ngokuthi uCele waphinde wabonakala ohlelweni lukamabonakude, noDkt JJ Tabane, lapho ayekhuluma khona ngokuboshwa kukaGetsemane, waze wambiza ngemafiya (mafia).
Baphinde bafune imali elinganiselwa ku-R137 000, omakhalekhukhwini, i-laptop, izibhamu nokunye abathi kwathathwa ngamaphoyisa ekilayentini labo.
Ngokusho kommeli, uMnu Sbu Dlamini, imali elinganiselwa ku-R100 million ifunwa nguGetshemane, ngokwenziwe kuye ehliswa isithunzi, kanjalo nokulahlekelwa kwakhe yimali eningi ngesikhathi eboshiwe.
“Kuliqiniso ukuthi uGetsemane usijubile njengabammeli bakhe ukuba sibophe umbuso ngokwenziwe kuye, okuhlanganisa ukwephucwa imali, nokwehliswa isithunzi ngesikhathi eboshelwa into engekho.
“Engingakusho wukuthi sikhona nesinye isikhulu esiphezulu emaphoyiseni KwaZulu-Natal esisibophayo kodwa kasizokulidalula igama laso ngoba kasikawatholi amaphepha aso.
“Leso sikhulu naso sasikhona ngesikhathi kuboshwa uGetsemane,” kusho uDlamini.
ONOGADA NABO BALAHLEKELWE YIMALI
UDlamini uthi ngokwamaphepha esenkantolo, onogada abawu-11, okunguMnu Thulani Tembe, nguMnu Mondli Xulu, nguMnu Mduduzi Ncube, nguMnu Njabulo Mkhize, nguMnu Sikhumbuzo Ndlanzi, nguMnu Vusumuzi Gumede, nguMnu Zimisele Duze, nguNkz Philile Manana, nguMnu Dumisani Nhlenyama, nguMnu Bonginkosi Mhlanga noMnu Edmondu Mtshali, bafuna ukunxeshezelwa -R500 000 umuntu emunye ngokuboshwa ngokungekho emthethweni.
“Onogada nabo babopha uMbuso ngoba bakhala ngokuthelwa ngamachathazelo abangahlangane nawo, kwazise bona babesemsebenzini wokugada uGetsemane.
“Uma kuboshwa yena, kwakungafanele bona baboshwe.
“Nabo baphinde balahlekelwa yisithunzi sabo ngokuboshwa, baphinde balahlekelwa yimali ngesikhathi abasichithe ezitokisini, behlalele amacala angekho, bengasebenzi,” kusho yena.
Uphinde waveza ukuthi ihhovisi likaCele selithunyelelwe incwadi.
UDlamini uthe kunamacala amabili avulwe esiteshini samaphoyisa eNanda ngokuboshwa kwalo somabhizinisi nonogada bakhe.
Lawa maphepha asenkantolo aphinde aveze ukuthi uGetshemane, ubopha noKhomishana wamaPhoyisa KwaZulu-Natal Lt-General Nhlanhla Mkhwanazi noCaptain Digby Wayne Thomas, owayengumphenyi wecala.
Okhulumela uCele, uNkz Lizandzu Themba uthe uzobheka ehhovisini okungena kulona izindaba ezinjengalezi ukuthi lukhona yini oluthinta uGetsemane.