Kabekho abakhuluma ngokuhlunyeleliswa kwezimilo zezakhamizi zakuleli
SESIYIZWILE imikhankaso yamaqembu ezepolitiki nezethembiso zawo ezweni lethu. Kule mikhankaso, kalikho elikhuluma ngendlela okumele izakhamizi ziziphathe ngayo, ukuze kube nokubambisana phakathi kukahulumeni ozobe uphethe ngaleso sikhathi.
Phela singakwenza konke, kodwa uma izakhamizi ziziphatha ngendlela engemukelekile, ngeke ibe khona intuthuko nozinzo kuhulumeni. Lokhu kuyingozi kakhulu.
Izakhamizi kakufanele ziphathiswe okwamaphuphu, wona alinda ukuba unina awafake ukudla emlonyeni, ngoba uma kunjalo, leli zwe ngeke lithuthuke futhi ngeke likwazi ukuzibambela mathupha ezintweni.
Makube nomqulu wokuziphatha kwezakhamizi ozolwisana nesimo esikhona
Mhlawumbe kumele abantu sibakhumbuze ukuthi yibona abawuhulumeni. Kangizwanga nelilodwa iqembu likhuluma ngezindlela zokuxhumana nezakhamizi ezizokwenza abantu balalelwe, ngaphandle kokuya emgwaqweni beyobhikisha.
Kangiwezwanga amaqembu ekhuluma ngendlela yokuziphatha elungile kwezakhamizi, uma zinganelisekile. Kumele kube nomqulu wokuziphatha kwabantu ozolwisana nesimo esikhona njengamanje.
Imvamisa uma abantu beteleka,
bayawahlukumeza amalungelo abanye. Bavala imigwaqo, bashaye izimoto, batape izinto, bashise ingqalasizinda, baphinde bashaye abantu. Kangikholwa ukuthi lokhu kwemukelekile entandweni yeningi.
Intando yeningi kayisho ukuthi abantu kufanele benze umathanda
Ngesikhathi sobandlululo kwakwenzeka ngoba uhulumeni owayekhona wawuvotelwa ngabamhlophe kuphela.
Manje yithina esifaka, siphinde sikhiphe ohulumeni. Sithini uma abantu betelekile, bese bebulala ingqalasizinda? Sithini abantu uma betelekile, beshaya abantu?
Kuyilungelo lawo wonke umuntu ukugodla amandla akhe uma engazwananga nomqashi.
Mina kakumele omunye umuntu angigodlise amandla ekubeni ngingaxabene nomqashi wami.
Kakumele ashaye imoto yami
ngamatshe, ngiziyela eholidini nomndeni wami.
Kumele kucace ukuthi izakhamizi kumele ziziphathe kanjani. Intando yeningi kayisho ukuthi abantu kufanele benze umathanda.
Uma usebenzisa ilungelo lakho, kakumele uhlukumeze omunye umuntu. Amalungelo ethu kufanele siwazi njengawabanye abantu, uma senze njalo kuyoba nokuthula ezweni lethu.
Akekho umuntu othanda izwe lakhe ongashisa ingqalasizinda efuna okuthile
Kalikho iqembu elikhuluma ngokuvuselela izimilo kubantu, okungenye yezinkinga ezinkulu ezibhekene neNingizimu Afrika.
Uma sikhuluma ngentando yeningi (democracy), sisuke singasho ukuthi abantu kumele bazenzele noma yini. Ukwenza umathanda (laissez-faire) kakusiyo intando yeningi.
Umathanda wenza izwe lingabi namthetho; lokhu kufanele thina abanye silwisane nakho ngazo zonke izindlela.
Abantu baseNingizimu Afrika kusafanele bafundiswe ukuze bayiqonde kahle intando yeningi.
Kumele bafundiswe nokuthi ulibamba kanjani iqhaza ezweni lakho ukuze lithuthuke.
Kumele sibe nothando lwezwe lethu (patriotism). Akekho umuntu othanda izwe lakhe ongashisa ingqalasizinda ngoba efuna okuthile.
Udlame nokubulala esinakho ngeke kusisize ukunqoba izinsalela zobandlulo
Usishiselani isikole ngoba ufuna umgwaqo? Uzishayelani izimoto zabantu uma ufuna izimfuno zakho?
Lezi zenzo kaziwenzi umqondo. Njengamanje sinezinkundla eziningi esingazisebenzisa ukuveza izikhalo zethu.
Kungani sikhetha izindlela ezenza sibulale okukhona, uma sifuna okungekho?
Ngo-2002, uMnu Nelson Mandela waqhamuka nenhlangano yokuhlunyeleliswa kwezimilo kubantu (Moral Regeneration Movement), ezama ukubuyisela ubuntu kubantu.
Wayebonile ukuthi siyisizwe esibuthakathaka, esidinga ukwelashwa nokuhlunyeleliswa.
Isizukulwane sobabamkhulu sagwinya ingcindezelo yobuKoloni, sagwinya nengcindezelo yobandlululo.
Nanamuhla umuntu onsundu usacindezelekile, ngenxa yemiphumela yengcindezelo yobandlululo. Udlame nokubulala esinakho ngeke kusisize ukunqoba izinsalela zobandlulo.
Masilwele amalungelo ngendlela engezukuqeda isithunzi sethu
Uma sibulala ingqalasizinda, siziphindisela emuva. Sigcina sesiyothenga emadolobheni izinto okufanele ngabe sizithenga lapho sihlala khona.
Kwasisiza ngani nje ukutapa (looting)? Kakusiphindiselanga emuva?
Mntonsundu, phaphama, kusile manje!
Kungani uhuqa ubuthongo sekuphume ngisho ilanga? Masilwele amalungelo ethu ngendlela engezukuhamba nesithunzi nokuhlonishwa kwethu emhlabeni.
* UMnu: Callistus Bheki Nkwanyana
Uneziqu zeMasters in Governance and Political Transformation
Wayengumqondisi eKZN office of the Premier: Community Partnership and Moral Regeneration
Ungumbhali wencwadi esihloko sithi, “Talking to Yourself, the Journey to Self-discovery”
Uyatholakala ku: nkwanyanacb60@gmail.com naku-066 544 5466 ngocingo nangeWhatsApp