Usephumelele owasizwa yiLANGA
Usebhaliswe ngokusemthethweni koweChartered Accountant
USEZUZE olukhulu ngokufeza isifiso sakhe okwangenelela iphephandaba ILANGA efuna ukubhalisa enyuvesi emuva kokuphothula umatikuletsheni ngo-2016.
UNkz Nolwazi Mtshali (24) waKwaMaphumulo, useqashwe waba yiChartered Accountant (CA), eGauteng, ngaphansi kwenkampani i-Ernst and Young Inc (EY) okuyinkampani enkulu kuleli kulo msebenzi.
UNkz Mtshali owashonelwa ngabazali esemncane, wakhuliswa nguninalume, uphothule umatikuletsheni ngamalengiso eMenzi High School, eMlazi, eThekwini. Uthi ujabule kakhulu ngokuphumelela kohambo lwakhe oluqale esikhungweni i-University of Zululand (UNizulu).
Ngesikhathi ehlomula ngemali yokubhalisa esikhungweni semfundo ephakeme, ulekelelwe yileli phephandaba ngosizo lukasomabhizinisi waseThekwini, uMnu Nhlanhla Cele ophinde abe yinyanga.
UNkz Mtshali uphothule iziqu zeBcom Accounting Science, e-UNizulu, wathweswa neziqu zePost Graduate Diploma kwiAccounting, e-University of Cape Town.
Usebhaliswe ngokusemthethweni ngaphansi kwe-Assessment of Professional Competence (APC) KwiSouth African Institute of Chartered Accountants (SAICA).
Inyuvesi yaseZululand ithe ukungena kukaNkz Mtshali kulesi sigaba, kuqinisekisa ukuthi lesi sikhungo sibalwa namayuvesi awu-16 kuleli agu-nyazwe ngaphansi kweSAICA.
UNkz Mtshali ngesikhathi ephothula umatikuletsheni, uthole oDistinction abawu-5, okwenza u-88% wokuphasa kahle kwakhe, sekuhlanganiswe zonke izifundo.
Esengenile enyuvesi yaseZululand, ufonelwe nguthisha wakhe emazisa ukuthi usehlomule ngomfundaze iThuthuka Busary Fund.
Lo mfundaze bewufuna umfundi ozomxhasa uma ezokwenza iziqu zeBcom Accounting kulesi sikhungo, okuyilapho kuqale khona ukukhanya kohambo lwakhe kulo mkhakha.
Ngesikhathi ehlomula ngawo, waziswe ukuthi umfundaze uzokhokhela izindleko zezifundo, ukudla, yimali yezincwadi konke lokho kuzokhokhelwa esenza iziqu zakhe zokuqala (Under graduate) neziqu ezithuthukile iHonours Degree.
Ngo-2020 uphothule iDegree yakhe e-UNizulu waqhubeka nePost Graduate Diploma e-UCT ngo-2021.
Ngo-2020 wathola umsebenzi wesikhashana woqeqesho (internship) waba ngumcwaningimabhuku (Auditor). Imiphumela yokuphasa kahle kwakhe ngaphansi kweSAICA APC, imenyezelwe ngoNhlolanja (Febraur) kulo nyaka.
Ngokusho kwakhe engxoxweni abekade enayo nenyuvesi, uthi uthando lokwenza lo mkhakha uluthole kuNkz Busisiwe Mdletshe waseNgonyameni, eThekwini naye oyiChartered Accountant.
“Umkhakha wakwa-Accounting uphonselana kakhulu inselelo. Kufanele usebenze kanzima ukuze uphumelele. Lolu hambo lufuna uzimisele kakhulu,” esho. mthobisis@ilanganews.co.za www. ilanganews.co.za