SITHOLWE EBHUTHINI ISIDUMBU SIKADOKOTELA OBENYAMALELE
KUSOLWA ukuthi ababulali bebevele befuna ukumsoconga udokotela waseMgungundlovu, isidumbu sakhe esitholwe ebhuthini yemoto yakhe ngoLwesihlanu ntambama.
Isidumbu sikaDkt Zamambo Mkhize (39) obehlala eHilton, eMgungundlovu, sitholwe elokishini eMbali ngemuva kwamahora ambalwa engaziwa ukuthi ukuphi, futhi engatholakali ocingweni lwakhe.
Kuthiwa ubegcine ukubonakala ephuma emsebenzini esibhedlela i-Edendale abesebenzela kusona, ehamba ngemoto yakhe, i-VW Polo Vivo.
Udaba lokubulawa kwakhe lusabalele ezinkundleni zokuxhumana ezahlukahlukene; abantu bezwakalisa ukushaqeka ngendlela abulawe ngayo, abanye betusa isineke abenaso emsebenzini wakhe nokuzithoba abenakho.
Ubengudokotela wezingane owaziwayo kulesi sibhedlela.
ILANGA lithole ngemithombo yalo ukuthi isidumbu sikaDkt Mkhize sitholwe siboshwe izandla nezinyawo, ebusweni sivuvukele, okwenza kube nezinsolo zokuthi uqale washawa ngaphambi kokuba adutshulwe ekhanda.
ILANGA lixhumane noMnu Ntozonke Mkhize, ongumfowabo kamufi, olitshele ukuthi ngumkhwenyana kadadewabo obabikele ngokunyamalala kukamufi.
Uthe nabo bazamile ukuxhumana naye ocingweni lwakhe, kodwa bangamthola.
“Ngehora lesikhombisa siye kobika udaba esiteshini samaphoyisa aseMgungundlovu, okuthe sesiqedile ukubika udaba, amaphoyisa asitshela ukuthi isitholakele imoto yakhe.
“Kuthe uma ibhekwa (imoto), kwatholakala ukuthi kuthathwe ucingo lwakhe nesikhwama,” esho.
Uthe bakholwa wukuthi ababulali bebefuna impilo kadadewabo.
“Abantu abenze lesi sigameko bebefuna yena udadewethu.
“Ukube bebefuna imoto, bebezoyithatha, bamshiye yena. Okwamanje sisadidekile ngoba kazikho nezinsongo ebezikhona maqondana naye.
“Bekungekho nokuhilizisana phakathi kwabo nomkhwenyana wakhe njengoba kunguyena ovule icala esiteshini samaphoyisa.
“Ubesenesikhathi eside enza lo msebenzi wobudokotela. Ushiye emhlabeni izingane zakhe ezimbili,” kusho uMkhize.
Okhulumela amaphoyisa KwaZulu-Natal uLt-Colonel Nqobile Gwala uthe amaphoyisa aseMgungundlovu aphenya icala lokubulala kulandela ukutholwa kwesidumbu sowesifazane sifakwe ebhuthini yemoto yakhe, eMbali.
“Amaphoyisa alandele umkhondo wesiqophamkhondo (tracker) oholele ekutheni imoto itholakale nesidumbu sesisulu,” kuphetha uLt-Col Gwala.