ALAXAZE I-ANC AMAKHANSELA (5)
ALAXAZE ubulungu bawo kuKhongolose amakhansela amahlanu kuMasipala uMzumbe, oholwa nguMnu Bongani Nyuswa, obonakala ubhekene nezinkinga. Lokhu akuveze esithangamini sabezindaba ebesisehholo lomphakathi eMthwalume ngoLwesibili.
Lawa makhansela ayingxenye yayisikhombisa amiswe yi-ANC, ngoba iwasola ngokuthi avota ngokubambisana ne-IFP. Aveze ukuthi asejoyine iqembu eliholwa ngowayengumengameli wezwe, uMnu Jacob Zuma, iMK Party.
Athi inuka phuhlu inkohlakalo kulo masipala, okuyikho okuwenze agcine ephikisana nezinye zezinqumo ebezithathwa kulo masipala.
Aphinde abheca imeya nezinye zezikhulu ngenkohlakalo, athi ngisho kunamaphrojekthi enziwayo emphakathini, kawapheli ngoba kudliwa imali.
“Uma iphrojekthi isiphasisiwe, kusuke sekuphelile ngoba kusuke kufunwa imali. Uma sibuza ukuthi kungani iphrojekthi ingaqhubeki, bekuthiwa siyaphuma emugqeni, okuyikhona okusidalele amazinyo abushelelezi enhlanganweni,” kusho uMnu Sibonelo Maphumulo.
UMaphumulo ubengusomlomo kulo masipala, waxoshwa yiqembu lakhe, i-ANC ngasekuqaleni konyaka ngemuva kwezinsolo zokuthi ungubhongoza kula makhansela asolwa ngokuvota ne-IFP.
Lawa makhansela okunguMnu Sbonakaliso Hadebe obeyikhansela kuWard 2, nguMnu Bheki Ngema wakuWard 3, nguMnu Thulo Mkhungo wakuWard 1, nguMnu Thuthukani Ngeze wakuWard 19 noMnu Ayanda Duma wakuWard 9, akhale ngokugqoza kokuyiswa kwentuthuko kubantu.
UDuma uthe bakhethe ukuthatha lesi sinqumo ngoba bebona ukuthi vele ‘bayizichuse’, njengoba bebengakwazi ukuveza uvo lwabo ngokukhululeka.
“Kungcono khona ukuthi kuyiwe okhethweni lokuchibiyela, umphakathi uzikhethele amakhansela owafunayo ngoba okwamanje kudlalwa ngawo,” esho.
La makhansela athi afisa ukuba kutshalwe uphiko lwamaphoyisa iSIU, ukuyophenya lo masipala ngenkohlakalo.
Okhulumela uMasipala uMzumbe, uMnu Sabelo Ncwane, uzichithile izinsolo zenkohlakalo okubalwa nokungapheli kwamaphrojekthi.
“Udaba lwakuWard 01 oluthinta iphrojekthi kagesi yakwaSunduza, okuthiwa akwenzeki lutho, umasipala ungaqinisekisa ukuthi leyo phrojekthi isiya ngasemaphethelweni, osekusele wukuthi kufakwe ama-transformer bese u-Eskom ukhanyisa.
“Umgwaqo uNgcengesi Access road (kuWard 3), ufana nosuphelile ngoba kusele ukuthi kwenziwe imidwebo nezimpawu. Ngenxa yokucabangela abantu baseMzumbe nalapho umasipala wamisa usonkontileka, yize umgwaqo wawusuphela, ngenxa yokungeneliseki ngezingxenye ezithile zomsebenzi,” kusho yena.