Ugcwele ukuzethemba umqeqeshi weBafana
Uyibona izongena kwiNdebe yoMhlaba ezokuba ngo-2026
UGCWELE ukuzethemba umqeqeshi weBafana Bafana uHugo Broos obheke ukungena kumnyama kubomvu emqhudelwaneni weNdebe yoMhlaba yeFifa ozokuba se-USA, eCanada, naseMexico ngo-2026 njengoba efanisa isikwati sakhe nomshini ogeleza amafutha ngendlela efanele kuzona zonke izingxenye.
Ukusho lokhu ngemuva kokuba ezakhe zishayane zaze zabukana ne-Algeria, kuba ngu-3-3, kowobungani obusezingeni eliphezulu ngoLwesibili ebusuku eNelson Mandela Stadium, e-Algiers, kuleliya lizwe.
Amagoli eBafana aqotshelwe enethini nguThemba Zwane (amabili) ngomzuzu ka-34 noka-45 nelika-Iqraam Rayners ngoka-66.
Awe-Algeria abhakuziswe enethini nguYassine Benzia ngomzuzu ka-22 nangoka-70, kwathi elinye labekwa enethini nguYacine Brahimi ngoka-53.
Bonke abadlali beMamelodi Sundowns baqede lo mdlalo bathatha indiza ebheke eTanzania kwazise le kilabhu inomdlalo onzima we-quarter-final yeCaf Champions League neYoung Africans FC, edume ngeleYanga, yakuleliya lizwe ngoMgqibelo.
Abanye abadlali beqembu lesizwe kulindeleke ukuba batheleke kuleli namuhla ngoLwesine.
“Womabili amazwe adlale kahle, abalandeli kabayikhalelanga imali yabo. IBafana ibidlala nezwe elinzima, i-Algeria ikhombise ukuba yingozi.
“Nokho kangisenalo uvalo ngamazwe esizotholana phezulu nawo emidlalweni yokuhlungela iNdebe yoMhlaba.
“Uma abadlali beqhubeka kanjena, kangiboni kukhona izwe elingama endleleni yethu,” kusho uBroos.
URayners ukhombise ukulilambela ijezi kulo mdlalo, kanjalo noMihlali Mayambela noNyiko Mobbie odlala kwesokudla emuva.
UKhanyisa Mayo kucacile ukuthi kusafanele aqine ukhakhayi.
Emdlalweni olandelayo iBafana izobhekana neNigeria ekuhambeni ibuye ibhekane neZimbabwe kuleli ngoNhlangulana (June), kweyokuhlungela iNdebe yoMhlaba.
...kangiboni kukhona izwe elingama endleleni yethu.