Ugwaze wabulala indodana evikela umkakhe
Umndeni uthi umxolele uyise ngoba kube yiphutha, futhi ungumuntu ongenalo udlame
ZIMKHALELE owesilisa waseMbitane, KwaMaphumulo osolwa ngokugwaza abulale indodana yakhe yashona evikela umkakhe. Simuncu isimo emndenini wakwaNjapha kulandela isigameko esenzeke lapho uMnu Xolani Njapha (37) egwazwe wabulawa nguyise emuva kwengxabano equbuke phakathi kwakhe nonina.
Kubikwa ukuthi umufi ugwazwe nguyise wabe esephuthunyiswa esibhedlela lapho efike washonela khona.
ILANGA lithole ukuthi ingxabano phakathi kwalaba iqale ngesikhathi unina kamufi emfihlela ummese abefuna ukuwuthatha njengoba ubephuzile.
Kuvele ukuthi umufi ubejwayele ukuhamba ephethe ummese uma eyophuza, okuyinto unina abengahambisani nayo. Kuthe uma emfihlela wona kwabe sekuqubuka ingxabano eholele ekutheni ashone.
UNkz Zothile Njapha ongudadewabo kamufi, uthi bengumndeni babhekene nesimo esinzima abangazi ukuthi bazodlula kanjani kusona. Uthi umufi ubengumuntu okhonze uphuzo oludakayo, esikhathini esiningi ubeba nodlame uma ephuzile.
“Yize bengingekho ekhaya kodwa engikuzwile ukuthi umfowethu ufike ekuseni ephuzile wabe esefuna ukuthatha ummese.
“Umama ubengayizwa kahle indaba yakhe yokuhlale ephethe ummese ngoba emazi ukuthi ungumuntu onolaka uma esephuzile, obekungagcina elimaze abanye abantu lapho esuke ephuza khona.
“Ube esewuthatha ummese wakhe wawufihla. Lokhu kumcasulile umfowethu, waxabana nomama bebanga indaba yawo.
“Kugcine kufinyelela ekutheni afune ukulimaza umama njengoba bebexabana, okulapho ubaba engenelele khona, ezama ukuvikela umama.
“Ubaba nomfowethu balwile okuholele ekutheni agwazeke umfowethu. Ngithole umbiko wokuthi usephuthunyiswe esibhedlela okuthe ngokuhamba kwesikhathi, ngathola ukuthi useshonile,” kusho uNkz Njapha.
Uthe bengumndeni bayakuqonda ukuthi uyise ubengaqondile ukwenza lokhu, kodwa ubezama ukuvikela unina. Uthi yize engenaso isiqiniseko sokuthi ezinye izihlobo zizizwa kanjani, kodwa bona bamxolele uyise.
“Ubaba akayena umuntu onodlame futhi siyazi ukuthi okwenzekile kube yiphutha. Abezama ukukwenza wukuvikela umama njengoba umfowethu ubefuna ukumlimaza, kodwake ngalokhu kangikhulumeli wonke umuntu ngoba kasazi ukuthi ezinye izihlobo zona zicabangani. Thina ohlangothini lwethu, simxolele,” kusho Nkz Njapha.
Uthe njengamanje basazama ukuhlanganisa ukuze bezofihla umufi yize kunzima njengoba kunguyena yedwa otohozayo.
Okhulumela amaphoyisa KwaZuluNatal, uConst Thenjiswa Ngcobo, usiqinisekisile lesi sigameko, wathi kuvulwe icala lokubulala, kanti ukhona umsolwa oneminyaka ewu-60 oboshiwe, uzobuyela enkantolo maduze.