INKOSI USHABALALA IFEZE ISETHEMBISO NGOKWAKHELA ABAYIZINTANDANE INDLU
IFEZE isethembiso esenze enyangeni edlule iMeya kuMasipala wesiFunda uThukela, iNkosi uNtandoyenkosi Shabalala, ngesikhathi ihambele umuzi ewubone iyokwethula uhlelo emphakathini waseSteadville, yafisa ukwakhela lo mndeni indlu ozohlala kuyona njengoba sekusondele ubusika.
Lo mndeni uhlala izingane ezine ezisanda kushiywa ngumzali. Yathembisa ukuthi izokhipha ephaketheni layo, yakhele lo mndeni indlu.
NgoLwesibili iNkosi Shabalala, ibiyobheka ukuqhubeka kokwakhiwa kwendlu okuqalwe ngasekupheleni kwesonto eledlule. Iqale uchungechunge lwemihlangano yomphakathi, lapho umasipala uhambela izindawo ezahlukene ukuzwa ngezidingo zezakhamizi.
Kule mihlangano yilapho kubuyekezwa khona usomqulu wentuthuko edidiyelwe nesabelomali sika-2024/25.
Umhlangano wokuqala ubanjelwe eSt Chad’s, eMa-2000, wadlulela eWatersmeet ngaphansi kukaMasipala i-Alfred Duma.
“Inhlosongqangi yale mihlangano wukuzama ukuthola imibono neziphakamiso ezizofakwa kusomqulu wentuthuko edidiyelwe nesabelomali sika-2024/25,” kusho iNkosi Shabalala.
Iphinde yachaza ukuthi umsebenzi omkhulu woThukela, wukulethela izakhamizi amanzi ahlanzekile nokuhlinzeka ngezindlu zangasese.
“Inhloso yokuhlangana kwethu wukuzama ukubambisana nomphakathi ukuze ukwazi ukusicebisa siwumkhandlu ngezinye zezidingo zawo eziseqhulwini ngoba yiwona oziqonda kahle,” esho.
Uphinde wethula nosonkontileka ozofaka ipayipi lamanzi endaweni okulindeleke ukuthi lo msebenzi uthathe isikhathi esingangonyaka.
Izakhamizi zijabulele ukuthi kazizokuhlomula nje ngokufakwa kwaleli payipi lamanzi kuphela, kodwa ngesikhathi kuqhubeka umsebenzi, kukhona abawu-20 abazobe besebenza.
Lo msebenzi unikezelwe inkampani ezimele, iSinethemba Construction, uzodla imali ewu-R28 million. Okuqapheleke kakhulu wukuthi isililo besicishe sifane njengoba iningi labantu elinikwe ithuba lokuphawula, likhale kakhulu ngokwentuleka kwamanzi.
Engxenyeni yesibili eWatersmeet, imeya yethule unhlelo lokwakhiwa kwesigcinamanzi esizogcina amanzi aphuma eziphethwini abe esehlanzwa, aphuzwe yizakhamizi.
Le projekthi eku-ward 16, idle imali ewu-R4.3 million, ibe seyinikezelwa ngokusemthethweni emphakathini osale sewuphuza amanzi ahlanzekile aphuma kompompi.
Imeya iphinde yakhumbuza izakhamizi ukuthi kubalulekile ukuthi ziwakhokhele amanzi, yathi kulabo abangenawo amandla nabangasebenzi, lukhona uhlelo abangena ngaphansi kwalo olubahlinzeka ngamanzi angamalitha awu-6 000 ngenyanga, kodwa kubalulekile ukuthi babhalise ngaphansi kwalo.
Ngemuva kokuphawula komphakathi, iNkosi Shabalala ijube ithimba elizobheka ukulungiswa kompompi okubikwe ukuthi banenkinga. nonhlakaniphos@ilanganews.co.za