Umqeqeshi weDowns ubalisa ngokutubeka
Uthi akekho onendaba nobunzima ababuthwele bokungaphumuli
UKHALA ngokutubeka komzimba uRulani Mokwena ololonga iMamelodi Sundowns ebhekene noxhaxha lwemidlalo yemiqhudelwano eyehlukene.
AmaSandawana aguqise ngo-4-3 wamaphenathi i-University of Pretoria kwi-quarter final yeNedbank Cup ngoLwesihlanu ebusuku eLucas Moripe Stadium, e-Atteridgeville, emdlalweni ophele zibambene ngo-1-1.
Igoli leDowns livalelwe enethini nguLucas Ribeiro, eleTuks leza noDelano Abrahams.
IDowns inqoba lo mdlalo nje, namuhla ngoMsombuluko ngo19h30 izobhekana neMoroka Swallows koweDStv Premiership eDobsonville Stadium, eSoweto.
Izosuka kulo mdlalo ilibhekise eTunisia lapho izotholana khona phezulu ne-Esperance kwi-semi final yeCaf Champions League ngoLwesihlanu ngo-18h00 eStade Olympique Hammadi Agrebi, eTunisia.
UMokwena uthi umzimba wakhe utubekile ngenxa yokusebenza kanzima elungiselela imidlalo esondelene.
“Ngidonsa kanzima ukulala. Ngibatshelile abadlali bami ngesikhathi bengijabulela bengiphonsa phezulu ngemuva komdlalo, bengibamba eqolo, ukuthi sekuzofanele ngilale ngesisu.
“Nami ngivumelekile ukukhathala ngoba ngingumuntu, kangisilona irobhothi.
“Ngichitha isikhathi esiningi ngenza umsebenzi wekilabhu.
“Into engiyifundayo kulezi zinsuku wukuthi nami ngivumelekile ukuzizwa umoya uphansi njengawo wonke umuntu.
“Nami ngiyababekezelela abadlali bami uma bekhathele, nesami isimo kuzofanele basamukele,” esho.
Uthi okumchazile ngalo mdlalo weTuks wukuthi kabavumanga ukuphonsa ithawula, nakuba bekunzima.
“Kuzofanele sifuqe kunzima kunjalo. Ngiyabona ukuthi bakhona nabanye abadlali abasesimeni esifana nesami, kodwa akekho onendaba nalokho, kufanele silwe.
“Ngubani onendaba nokuthi ngizizwa ngikhathele? Akekho.
“Uma singake sehlulwe nje umdlalo ubemunye, uzozizwa izinkulumo.
“Ngidinga ukulala ngivale ucingo lwami ngingakhulumi ngisho nanabadlali bami kodwa kangikwazi, kufanele sifuqe siye phambili.”
Isiyonke imidlalo yeDStv Premiership ephakathi nesonto imi kanjena:
NAMUHLA NGOMSOMBULUKO
EDobsonville Stadium:
Swallows vs Mamelodi Sundowns 19h30.
NGOLWESITHATHU EPeter Mokaba Stadium:
Sekhukhune United vs Stellenbosch FC 19h30.
ELucas Moripe Stadium:
SuperSport United vs Polokwane City 19h30.
Moroka