UZimdollar uthumelele iGcokama amasamanisi
Ufuna lo mculi axolise ngenkulumo yakhe ‘emehlisa isithunzi’
SELUTHATHE elinye igxathu udaba lomculi kamaskandi nomsakazi woKhozi FM, njengoba umculi esethunyelelwe amaphepha asenkantolo amphoqa ukuba axolise zingakapheli izinsuku eziwu-30, ngenkulumo ayenza ethi wazi “isinqe” salo msakazi ebumnyameni.
UZimiphi “Zimdollar” Biyela uthumelele uMthandeni “iGcokama Elisha” Manqele amasamanisi kuleli sonto, eMdletsheni, eHluhluwe.
Ngokuthola kweLANGA, lokhu kumayelana nokungaboni ngaso linye phakathi kwalaba bobabili ngenxabano yabo ebheduke emasontweni amabili edlule emcimbini iMother of All Maskandi Festival ePeople’s Park, eThekwini.
Kulo mcimbi uZimdollar wagcina ngokuhlwitha lo mculi umbhobho esiteji.
Abameli balo msakazi bafake amaphepha eNkantolo eNkulu eThekwini, okuba lo mculi axolise kuZimdollar ngokumehlisa isithunzi ngokuthi ‘useke waya naye ocansini’. Bafuna ukuthi uma lo mculi ehluleka ukwenza lokhu ezinsukwini eziwu-30, akhokhe inhlawulo ka-R1 500 000.
Lawa maphepha asenkantolo abonwe yileli phephandaba, athi lo mculi ukhulume kabi ngalo msakazi kwiNhlaka Production, wamehlisa isithunzi.
Uyalelwe ukuba axolise kuyona le nkundla yezindaba esakaza kwiYoutube.
Ethintwa yileli phephandaba uZimdollar, uthe inkulumo yeGcokama idicilele phansi isithunzi sakhe. Uthe lo mculi wazi kahle kamhlophe ukuthi akukhuluma akulona iqiniso.
“Akakhulumanga ngesenzo sakhe sokuthi kungani engawuhloniphanga umcimbi ayeqashwe kuwona, yena wabona ukuba aqhamuke namanga ukuze ezokuba sematheni ezinkundleni zokuxhumana.
“Lokhu akwenzile ukhombise ukungawucabangeli umndeni wami, izingane zami nomyeni wami. Uyangidelela,” kusho uZimdollar.
Uveze nokuthi imenenja yalo mculi izamile ukucubuza amagabade kuyena emuva kwalesi sigameko, yathi iGcokama belincokola ngale nkulumo. Uthi nakuba imenenja izamile ukuzehlisa kodwa iGcokama liqhubekile nale nkulumo, lixoxa nelinye lamaphephandaba esiZulu, liqophe i-video enamekwe yileli phephandaba ezinkundleni zokuxhumana. “Angisasiboni isidingo sokuxoxa noMthandeni nemenenja yakhe ngoba okukhulunywe yimenenja kimi eceleni, akuhambisani neze-nzo zakhe njengoba eqhubeka nale nto engamanga.” Incwadi yenkantolo kuthiwa yemukelwe ngozichaze ngokuthi uyingoduso yalo mculi. Ngakolunye uhlangothi, uMthandeni uthi yena ulindele ukuthi kube nguyena uZimdollar oxolisa kuyena ngokumphoxa phambi kwabantu. “UZimdollar nguyena odinga mina ngokwebhizinisi lakhe. “Mina bengilindele ukuba afike ekhaya azoxolisa njengoba kwakwenze oXolani Mcineka. “Ngokwami, uZimdollar ngamxolele ngalo loluya suku, sekuyoba kuyena ukuthi ufika nini ezoxolisa kimi,” kusho iGcokama. Lithe ngenkulumo yalo ethi ‘isinqa elisazi ebumnyameni alisiphapheli ekukhanyeni’, beliqonde ukuthi lokhu okwenzeka ngaloluya suku, impi yobumnyama. Lithe belingakayitholi incwadi yomthetho. “Kungenzeka ukuthi incwadi leyo inikwe omakoti ekhaya.” Ukungaboni ngaso linye phakathi kukaZimdollar neGcokama, kwabangelwa wukuthi iGcokama lehluleke ukufika ngesikhathi ebekuvunyelwe ngaso emcimbini, njengoba kwamele lingene esteji ngo-19h00 ebusuku. UZimdollar wathi sebelifonela iGcokama ngosuku lomcimbi, beli-ngasazibambi izincingo, okuthe selifikile latshelwa ukuthi ngeke lisangena esteji njengoba kwase kuqale uhlelo lokunandisa kwabaculi abawu-30 ababeqhudelana ngokwamavoti abo abawatholile kulo mcimbi.