Kukhalwa ngeSARB ngeyenzalo yemalimboleko
Umhlaziyi uthi selingcono izinga lokwehla kwamandla emali
AMFILIBA amathemba okuthi ibhange ngodla lombuso iSouth African Reserve Bank (SARB) lingahle liyehlise inzalo yemalimboleko kulo nyaka.
Indaba yenzalo yemalimboleko isematheni njengoba abathengi bekhala ngokuklinyeka ngenxa yokuthi iphezulu kakhulu, kanti abantu abaningi sebeyehluleka ukubhekana nezikweletu zabo.
Kusukela ngoNhlaba (May) 2023, iSARB inqume ukungayiguquli inzalo yemalimboleko ku-11,75%.
Abathengi abaningi bebenethemba lokuthi kusukela ezinyangeni ezimbalwa ezizayo kungenzeka iSARB iqale ukuyehlisa inzalo yemalimboleko.
Nokho umbiko weSARB, iMonetary Policy Review (MRP), oshicilelwe ngoLwesibili kuleli sonto, ukhomba ukuthi mancane amathuba okwehliswa kwenzalo yemalimboleko kulo nyaka.
Kulo mbiko iSARB ithi nakuba isimo sokwehla kwamandla emali (inflation) siye sathi ukudamba, kodwa asikazinzi ngenxa yezingqinamba ezikhuphule intengo yokudla nophethiloli kulezi zinyanga, okwenze izinga lokwehla kwamandla emali labhebhetheka lacishe lafinyelela ku-6% okuyinani iSARB elibekile ukuba lingeqi kulo.
Ezinyangeni ezedlule iSARB igxekwe kakhulu ngesinqumo sokungayehlisi inzalo yemalimboleko, kukhalwa ngokuthi kayibacabangeli abathengi.
Baningi nabanye abahlaziyi bezomnotho abayigxekayo iSARB.
Kamuvanjr, omunye wabahlaziyi ogxeke iSARB nguDkt Roelof Botha.
Ekhuluma esiteshini sezindaba iNewzroom Afrika, uthe izinga lokwehla kwamandla emali selingcono kunakuqala.
UDkt Botha ubuze ukuthi pho iSARB ilindeni njengoba ingayehlisi inzalo yemalimboleko.
Isinqumo esilandelayo seSARB kulindelwe ukuba simenyezelwe ngomhla ka-30 kuNhlaba.