Ikhala ngokuboshelwa amanqina enyathi inyosi
Lthi akekho ozoyisusa eqinisweni futhi kayibazondi abayakhele uzungu
“NINGABI nandaba nokuthi nizodlani futhi nizophuzani. Bhekani izinyoni zezulu, azibekelwe lutho futhi azinazinqolobane lapho zigcina khona ukudla, kodwa uNkulunkulu uyazondla.” Lona wumthandazo omncane oshaywe yinyosi yeSilo uMisuzulu kaZwelithini, uMnu Buzetsheni Mdletshe (65) waseGazini, KwaCeza, oLundi ngemuva kokuba uNdunankulu waKwaZulu-Natal, uNkk Nomusa Ncube-Dube enqamule isigubhukane inkontileka yakhe yokusebenza.
Ngemuva kokuxoshwa kukaMdletshe, ILANGA libe nenkulumo ekhethekile naye lapho elibikele ukuthi noma uhulumeni usinqamulile isivumelwano sokusebenza naye, kodwa uzoqhubeka nomsebenzi wakhe wokukhuleka emakhosini aKwaZulu.
UMdletshe uxoshwe ngencwadi ngeledlule ngoLwesihlanu. Izindaba zokuxoshwa kwakhe zisabalale ngoMsombuluko. Uthi lokhu kakuzange kumphazamise emsebenzini wakhe, futhi usazoqhubeka nawo.
“Ngifonelwe nguMnu Ntuthuko Mkhize, engitshela ukuthi kunencwadi eqhamuka ehhovisi likaNdunankulu okumele ngingalali ngingayitholile. Nebala ufikile nayo, ngayibona ukuthi kunqanyulwa inkontileka yokusebenza kwami. Akuzange kungethuse lokho, bengivele ngikulindele,” esho.
Uthi zimbili izinto ezimdalele isigcwagcwa, yindaba kaSihlalo we-ANC, KwaZulu-Natal, uMnu Siboniso Duma nekaNdunankulu waKwaZulu-Natal, uNkk DubeNcube.
Uthi ekaDuma yenzeka emcimbini wesikhumbuzo seSilo uDinuzulu, KwaCeza, oLundi.
“Emcimbini wokukhumbula iSilo uDinuzulu KwaCeza, uDuma wahlwitha umbhobho wokukhuluma uNdunankulu kaZulu, uMfu Thulasizwe Buthelezi, wabe esethi mangihashe iSilo uMisuzulu,
ngenqaba ngoba umthetho ngiyawazi.
“Lokho kwaba wusawoti esilondeni. Ngiphinde ngaqondisa ukukhuluma kukaNdunankulu uNkk Dube-Dube, okwakungelona iqiniso ekukhuluma emsakazweni, uKhozi FM. Ngaze ngambhalela incwadi, ngimtshela ukuthi iSilo kasikaze sibhace KwaCeza, kodwa kwakuwumuzi waso owawulapho.
“Ngamangala eseyiphinda le nto nangosuku lomcimbi, ngaphinde ngamnqanda nalapho. Sesisemhlanganweni eMayville, eThekwini, uNgqongqoshe wezeMpilo, uNkz Nomagugu Simelane, wayivusa le ndaba, wathi mina ngathi, undunankulu unamanga, esho esukela ilumbo. Kangikaze ngithi uNkk Dube-Ncube unamanga, mina ngaqondisa ukukhuluma nje,” esho.
Uma eqhubeka echaza ngenkontileka yakhe uthi: “Ngemuva kokuba ngithathe umhlalaphansi, iSilo uMdlokombane sathi mangifakelwe iminyaka emibili, ngiqhubeke ngisebenze. Isiphelile le minyaka emibili, ngibe sengisayina isivumelwano nohulumeni ngisebenzisa inkampani yami, iMavukefile, esiqale ngomhla ka15 kuNhlolanja (February) 2023, bekulindeleke ukuba iphele ngomhla ka-15 kuMasingana (January) 2025,” esho.
UMdletshe okumanje usebenza neSilo uMisuzulu, uthi ngeke awuyeke lo msebenzi.
“Ngeke ngiwuyeke lo msebenzi. ISilo uMdlokombane sahlaba inkabi, sangifaka inyongo esigodlweni eNyokeni, sathi yimina kuphela engiyokhuluma namakhosi aseNdlunkulu kaZulu.
“Kangiseyona ngisho inyosi mina, ngikhuluma namakhosi onke asendlunkulu asalala.
“Ngizwile nje abomnyango bethi baqashe inyosi uMkhize. UMkhize usemncane kabi, khona imikhosi angakaze ayibone ngisho nangamehlo. Singabala uMkhosi woSelwa nomcimbi wokuthela amanzi, lezo zinto akazazi nhlobo, akakaze azenze.
“Bangibophela amanqina enyathi kodwa kangibazondi, ngeke ngisuswe yibona eqinisweni nasemigomweni yesizwe,” esho.
Inyosi kuthiwa ibihola u-R30 000 ngenyanga. Ibuzwa ukuthi izophila ngani, ivele yashaya umthandazo omncane ifanisa impilo yayo neyenyoni.
Ngale kwalokho inyosi ibiyondla amakhosikazi ayo amabili nabazukulu abayisihlanu. Umsebenzi wayo wansuku zonke wukuyokhuleka esigodlweni ibike noma ngabe yini ethinta isiZwe samaZulu, iphinde ihambe neSilo uma idingeka.