UKELLY UVEZWE ‘NJENGONGQONDONGQONDO’ KWELIKAMEYIWA
LIVEZE ukuthi ngokophenyo lwalo, uKelly Khumalo ungungqondongqondo ecaleni lokubulawa kukaSenzo Meyiwa (osesithombeni) owayengunozinti we-Orlando Pirates neBafana Bafana, iphoyisa eliphenya leli cala, uSayitsheni Batho Mogola.
UMogola uveze lokhu izolo ngesikhathi ephekwa ngemibuzo ngummeli kammangalelwa wesithathu uMthombisi Mcube, uMnu Charles Mnisi.
UMnisi ukhumbuze inkantolo ukuthi ebufakazini bokuqala obethulwe kule nkantolo nguMogola, uthi ngokophenyo alwenza uyazi ukuthi kunongqondongqondo ongemuva kuleli cala. Ube esecela ukuba achaze kabanzi ngalowo ongungqondongqondo.
“Ngicela uchazele inkantolo ukuthi ngokophenyo lwakho, lo ngqondongqondo okhuluma ngaye ungubani. Uhlala kuphi? Uyamazi siqu sakhe? Siyayicela nje leyo mininingwane, nokuthi usicacisele ukuthi kungani engakaboshwa,” kusho uMnisi.
UMogola utshele inkantolo ukuthi ngokophenyo, ungqondongqondo nguNonhlanhla Kelly Khumalo.
Uveze ukuthi nakuba enalo lolu lwazi kodwa akekho esikhundleni sokudalula imininingwane yokuthi uxhumana kanjani nabammangalelwa futhi akazi kungani engakaboshwa.
UMnisi utshele inkantolo ukuthi ngokomyalo awuthole ekilayentini lakhe, okushiwo nguMogola kakulona iqiniso ngoba kalikaze lihlangane noKelly.
“Ummangalelwa wesithathu uthi akakaze ahlangane noKelly Khumalo empilweni yakhe, abakaze futhi baxhumane nangocingo noma akhulume naye ngaleli cala.
“Okokugcina, akukho okuveza ukuthi nalaba abanye abammangalelwa bakhuluma noKelly Khumalo. Lokho-ke kukhombisa ngokusobala ukuthi le nto iyitulo elakhelwe abammangalelwa naye uKelly Khumalo,” kusho uMnisi.
Iphoyisa liveze ukuthi ngeke liphawule kwelokwakhiwa kwetulo njengoba like layivezela inkantolo ukuthi kalikwazi ukudalula ukuxhumana kwabasolwa noKelly. Kulo leli cala uMnisi uphinde wathi uyafisa umbuso ubize uLongwe Thwala ezothula ubufakazi, aphinde acacise ngezitatimende zakhe ezimbili.
Uthi uma umbuso wehluleka wukumbiza (uLongwe), abammeli babammangalelwa bazocela inkantolo ukuba ibavumele bambize ngokwabo azofakaza. Kuzokhumbuleka ukuthi okwesibili kuvela igama likaKelly nelikaLongwe kuleli cala kusuka ngoMsombuluko.
Ngawo uMsombuluko ummeli kammangalelwa wesibili, uMnu Thulani Mngomezulu waveza ukuthi usola ukuthi isibhamu sikaLongwe yisona esabulala uMeyiwa njengoba ayexabana nowayeyintombi yakhe, uZandile Khumalo.
Uthe ngemuva kokuba sidubule uMeyiwa, uLongwe wasibhekisa ngakuye wazidubula emlenzeni, okuhunyushwa njengendlela yokudukisa ubufakazi. ElikaKelly livele ngoLwesibili ngesikhathi uMogola ephendula ummeli kammangalelwa wesihlanu, uZandile Mshololo, obuze ukuthi kungani uKelly engakaboshwa njengoba kunobufakazi bokuthi yayisikhona incwadi egunyaza ukuboshwa kwakhe.
UMogola uphendule ngokuthi akazi ukuthi kungani engaboshwanga, kodwa uyalwazi udaba lwencwadi aveze ukuthi watshelwa ngayo nguBrig Bongani Gininda, okunguyena ohamba phambili ekuphenyweni kwaleli cala.