'Indodana' kaNgema iphumela obala ngokumbiwa kwesidumbu sikayise
INDODANA kaMbongeni Ngema ephinde ibe ngumsunguli weqembu lomculo i-Afrosoul, uSabelo, izwakalise ukunengeka, yathi isiyime emphinjeni imibiko elokhu iqhamuka yokumbiwa kwesidumbu sikayise.
USabelo ophinde abe ngumsunguli wesikhungo sezobuciko Ikabawo Arts Academy, uthi usethule kwenela manje selokhu le mibiko yasabalala kungakapheli nesikhathi esingakanani umndeni ubeke uyise omncane endlini yakhe yokugcina emathuneni aseRed Hill, iHeroes Arch.
Uthe lokhu ukusho njengelungu lomndeni wakwaNgema elizimele futhi elixhumana nomndeni wonke.
“Kungamampunge ukuthi kunezinhlelo zokuthi kumbiwe isidumbu sikabab’omncane. “Okukhathazayo wukuthi lezi zinkulumo ziqhamuka nabantu abangafuni ukuziveza emndenini njengoba singenalo ulwazi ngazo,” esho.
Ukubeke kwacaca ukuthi njengomndeni kabekho ezinhlelweni zokumba, bangcwabe kabusha isidumbu sikaNgema.
Kunemibiko elokhu iveza ukuthi kunamalungu akwaNgema angagculisekile ngokuthi le nkakha yezeshashalazi yagcina ingadlulanga lapho idabuka khona eNhlwathi ngemuva kokushona kwayo.
UNgema washona engozini yemoto e-Eastern Cape ephuma komunye umngcwabo walowo ayesesebenzisane naye iminyaka.
Leli phephandaba labika ngokubhuntsha ngomzuzu wokugcina esenziwe wonke amalungiselelo enkonzo yesikhumbuzo eyayihlelelwe ukuba seNhlwathi, KwaHlabisa.
Kwavela nokuthi ukubhuntsha kwayo kwanenga amalungu omndeni wakwaNgema azinze khona njengoba amanye agcina engalubhadanga nasenkonzweni yomngcwabo eyayisezingeni likahulumeni eNkosi Albert Luthuli International Convention Centre, eThekwini.
Ngesikhathi leli phephandaba livakashele Emfana, eNhlwathi, ekhaya elikhulu lakwaNgema ngemuva komngcwabo, amalungu ayengafuni ukuphumela obala namagama awo, ayesanengekile, ekhala nangokuthi uNgema wayezisholo yena engomeni ukuthi mzukwane kufika usuku lokubizelwa koyisemkhulu, uyobekwa
Emfana.
USabelo uthe kulabo abasafuna ukucaciseleka ngalolu daba, bakhona abagunyazwe wumndeni ukuba bakhulume ngalo njengoba kubekwe umfowabo kaNgema omncane, uNhlanhla nomamncane wakhe ambize ngoMaGumede.