ISUSE UMSINDO EYOKUDLA OKUNIKELELWE IZITSHUDENI
UBONGE ukwamukelwa kahle ngamalungu e-Ecomomic Freedom Fighters’ Student Command (EFFSC), aseMfolozi TVET College, ophikweni lwaseSikhawini, uSihlalo we-ActionSA KwaZuluNatal, ogaqele esobundunankulu (eKZN), uMnu Zwakele Mncwango, ngesikhathi ehambisele izitshudeni zaleli kolishi ukudla ngoLwesibili.
UMncwango uveze ukuthi ubhalelwe yizitshudeni ze-EFFSC ezisesigungwini esihola abafundi, zimcela ukuba angenelele, alekelele ngokudla njengoba kunezitshudeni ezingakaze zizithole izibonelelo zazo esikhwameni seNational Student Financial Aid Scheme (NSFAS).
Uthi lezi zitshudeni zithole umyalelo kubaholi be-EFF esiFundeni iKing Cetshwayo, othi akavinjwe angakulethi ukudla.
“Abafundi abangithinta kabakufihlanga ukuthi bayi-EFF, kodwa ngasondela ukubasiza ngoba ngiyakuqonda ukuthi isisu asinayo ipolitiki. Ukudla okuhambile kuncane, kodwa kuzowenza umehluko. Engikucelayo wukuthi nabanye osomabhizinisi basondele bafake isandla.
“Lokhu engikwenzayo akusikho ukukhankasela ukhetho ngoba ngijwayele ukuhambela izikole ezisuke zinenkinga noma kungayiwa okhethweni. Ngibonga nabo abaholi bezitshudeni ngokungabi ngamagwala bakuvumela ukulethwa kokudla,” kusho uMncwango.
Unxuse abaholi bamanye amaqembu ezepolitiki ukuba balekelele nanoma yimuphi umuntu odinga usizo ngale kokubheka ukuthi ungaphansi kwaliphi iqembu lepolitiki, njengoba naye engabheki umbala wesikibha, kodwa esiza ohluphekile.
Uveze ukuthi ithimba lakhe alithumele kuleli kolishi liveze ukuthi izitshudeni ebezidinga usizo bezingaphezu kuka-300, nezibonakale zikuthokozela ukulethelwa ukudla njengoba beziphume ngobuningi bazo ukuzohlomula.
I-EFF Youth and Student Mobilisation Committee ikhiphe isitatimende isola uMncwango ngokuqamba amanga ngegama leqembu. Ithi akulona iqiniso ukuthi izitshudeni ezingaphansi kwe-EFF zimbhalele, zacela usizo kuye.
“Siyacela ukuthi abafundi nezakhamizi zesiFunda iKing Cetshwayo zingavumi ukuwela kulolu gibe losopolitiki abakhankasa ngegama le-EFF, nezinkinga zabafundi. Siyethemba ukuthi intsha yaseKing Cetshwayo ngeke ikuvumele ukuthengwa ngokudla, njengoba yazi ukuthi i-EFFSC yiyo emela abafundi uma bebhekene nezinkinga.
“Siyaziqhelelanisa nokuthi ubizwe yi-EFF futhi sifuna aveze ubufakazi bokuthi ubizwe yi-EFFSC yaseSikhawini,” kusho isitatimende.
UMncwango uhambise ukudla ngesikhathi iqembu leNkatha Freedom Party (IFP) linomcimbi wokwethulwa kwesabelomali sikaMasipala wesiFunda iKing Cetshwayo nesikaMasipala waseMhlathuze obewubanjelwe enkundleni yezemidlalo kulo leli kolishi.