Sizokhula uma sizibophezela ekusheshiseni izinguquko
NGESONTO eledlule i-International Monetary Fund (IMF), ishicilele lokho ekulindele emhlabeni, okube yisikhumbuzo esidabukisayo sokuthi sikude kangakanani ekubeni nomnotho osebenza ngendlela okufanele ngayo njengezwe.
I-IMF ilindele ukuthi iNingizimu Afrika ikhule ibe wu-0.9% kuphela kulo nyaka, inyukele ku-1.2% ngo-2025. Kodwa okuyikhona okusitshengisa kahle ukuthi zimbi kangakanani lezi zibalo, wukuziqhathanisa nokulindeleke emnothweni womhlaba njengoba i-IMF iqagula u-3.2% kulo nyaka nangonyaka ozayo.
I-Sub-Saharan Africa izokwenza kangcono kakhulu njengoba kulindeleke ikhule ibe wu-3.8% kulo nyaka, kube wu-4.0% ngonyaka ozayo. Uma ungayifaki iNingizimu Afrika neNigeria, okungamazwe amabili amakhulu ngokomnotho wawo, amazwe abampisholo aseAfrika azokhula abe wu-4.5% no-5.1%.
Lokhu okuvezwe yi-IMF, kutshengisa izinselelo eziningi ezibhekene nomnotho wethu, njengoba inkinga yezokuthutha inqinda amandla ethu okuthutha izimpahla siziyise ezimakethe zomhlaba, nokushoda kukagesi okuqhubekayo nokwehluleka kwengqalasizinda.
I-IMF ikhathazekile nangokuthi kuzokwenzekani njengoba kuza ukhetho, okungase kuphazamise izinguquko okufanele zenziwe wuhulumeni ukukhulisa umnotho wezwe. Kodwa futhi iyavuma ukuthi izinguquko zinomphumela omuhle, ikakhulukazi ekuxazululeni izinselelo zikagesi.
Inkinga wukuthi kuthatha isikhathi ukuthi ukukhiqiza kuhambisane namathuba avulwa yizinguquko. Kwi-Business Leadership South Africa (BLSA), siyazikhandla ukweseka umfutho wezinguquko ezizovula indlela entsha yokukhula komnotho.
Izinselelo zethu eziningi kusukela kwezokuthutha, ugesi nokungahlinzekwa kahle kwezidingo komasipala, zincike kwingqalasizinda. Siyaleseka ikomidi elengamele inkinga kagesi, iNational Energy Crisis Committee nekomidi elengamele inkinga yezokuthutha iNational Logistics Crisis Committee.
Ezinye izindlela esingenelela ngazo, wukuthola izinsizakusebenza nemali ukuqinisekisa impumelelo yazo. Kodwa kunesidingo esikhulu, futhi esiphuthumayo sokuthi kutshalwe imali kwingqalasizinda kagesi kuya ezikhungweni zokuhlanza amanzi nasemigwaqweni.
Isimo semali kahulumeni sisho ukuthi kawunayo imali kanti namabhizinisi awo anezinkinga ezinqinda ukusebenza kwawo, okusho ukuthi kawukwazi ukuphuma uyoboleka imali ukuze uzokwazi ukuzithuthukisa.
Into engasiza kungaba wukuthi imboni ezimele ilekelele ukuthola abatshalimali. Ngakho-ke, kungijabulisile ukubona imizamo yoMnyango wezeMali ekuqaleni kwale nyanga uxoxisana nemboni ezimele mayelana nezinguquko ezinqala ozenzayo ngokusebenzisana kukahulumeni nezinkampani ezizimele.
Izinguquko osekunesikhathi eside kuxoxwa ngazo zizokwenza imicikilisho yalobu budlelwano ibe lula. Zizokwenza futhi kube lula kuhulumeni ukubheka iziphakamiso zalobu budlelwano ezingagcinwanga.
Lokho kwenza ukuthi imboni ezimele ikwazi ukuthuthukisa iziphakamiso esingaziyisa kuhulumeni ukuze kube nezivumelwano ezizoxazulula ezinye zezinselelo esibhekene nazo.
Ngithanda kakhulu ukuthi lokhu kunikeza izixazululo ezibuka ngeso elibanzi nokubalulekile, ukuqinisekisa ukuthi sibhekana ngqo nezinselelo esibhekene nazo.
Nakuba kube nomkhankaso omkhulu wokwakha ingqalasizinda kule minyaka eyisihlanu edlule, kusungulwa i-Infrastructure South Africa nesikhwama sengqalasizinda, lokhu akuholelanga ekutshalweni kwingqalasizinda ebesikulindele.
Okunye okuzosiza wukuhlukanisa izinto, ukwenza amabhizinisi nohulumeni basekhaya basebenzisane ukuxazulula izinselelo zendawo.
Izinguquko ekusebenzisaneni kukahulumeni nemboni ezimele zingakwenza lokhu kodwa zisazodinga abaphethe kwezepolitiki bahambisane nalokhu, futhi nohulumeni ezweni lonke ukweseke ukuze nezinye izinhlaka zikahulumeni zikwamukele njengesixazululo esibalulekile kwizinselelo zengqalasizinda esibhekene nazo.
Umbiko we-IMF ubalulekile uma sibheka lapho sikhona futhi uvulana amehlo.
Enye yezinselelo zezepolitiki ngezinguquko, wukuthi imiphumela ingathatha iminyaka ngaphambi kokubonakala.
Impela izinguquko zikagesi zangonyaka odlule zizoholela ekupheleni kokucishwa kukagesi cishe eminyakeni emibili ezayo.
Ezokuthutha zizothatha isikhathi eside kakhulu ukuze kubonakale amachweba nezitimela kusebenza kahle njengoba kwethulwa izinguquko zomthetho futhi kugcine kube noshintsho endleleni okwakhiwa futhi okuphathwa ngayo ingqalasizinda.
Ukusebenza esikubonayo kwamanye amazwe eSub-Saharan Africa, kuwumphumela wezinguquko ezineminyaka zenziwa, ezigcine zithele izithelo futhi kwaba nemiphumela ebonakalayo emnothweni.
Kudingeka wonke umuntu akhombise ukuvuthwa emqondweni futhi kucatshangelwe izwe ukuzibophezela nokuqhuba izinguquko ezizothela izithelo emuva kweminyaka embalwa.
Ngiyathemba ukuthi izinguquko eziningi esizenzayo zisungula leso sisekelo. I-BLSA izibophezele ekwenzeni okudinga yona ukuze siphumelele.