U-Elroy Gelant ulubalubela ukuya kuma-Olympics
Uzozama ukwenza isikhathi esizomfaka kuwona kwiDurban International Marathon
UGAQELE ukungena eqenjini eliya kumaOlympic Games u-Elroy Gelant ozokube eyingxenye yeDurban International Marathon ezokuba ngeSonto ihlanganise ne-10km.
IMarathon izosukela phambi kwaseToyota, eSiphingo, isongwe ngaphandle kwaseMoses Mabhida Stadium, eThekwini, kanti i-10km izosukela eSuncoast Casino.
Lo mjaho uyi-gold label yeWorld Athletics kanti uzokube uyiNational Marathon Championships ehambisana neCAA Region 5 Championships.
Abasubathi abazobamba iqhaza kuwona bazozama ukwenza izikhathi zokuya kuma-Olympics azokuba nonyaka eFrance. Isikhathi sabesilisa wu-2:08:10, esabesifazane wu-2:25:50. Abasubathi bazothola amaphuzu ukubasiza ukukleliswa kangcono kwezokugijima emhlabeni.
UGelant usanda kwenza isikhathi esiwu-2:08:52, wahluleka kancane ukwenza esama-Olympics. Lo msubathi usefomini enhle kulezi zinsuku njengoba esanda kungena isibili kwi-Absa 10k eGqeberha, waphinda wathatha indawo yesibili kwiSA Track and Field Championships ebangeni lika-5000m.
Kuyo yomibili le mijaho abasubathi bathola amaphuzu kuyona. Kumanje uGelant ukleliswe kunombolo 69 emhlabeni.
“Kangikaliphonsi ithawula ngokuya kuma-Olympics. Lo mjaho wangeSonto uzongisiza ukunyusa amaphuzu ami kwezokugijima. Ngingajabula uma abadidiyeli balo mjaho bengamema abasubathi abanesivinini ukuze sikwazi ukwenza izikhathi ezinhle.
“Uma kungaba khona abasubathi abayisithupha abanesivinini, singakwazi ukusizana ukwenza izikhathi ezinhle ngeSonto.
“Okuhle wukuthi umzila walo mjaho muhle kanti abasubathi asebeke bawunqoba bavelele emhlabeni,” esho.
UGelant usubathela iBoxer AC. Ngokusho kwabadidiyeli balo mjaho, balindele abasubathi abaphuma emazweni awu-14 angaphansi kweCAA Region 5.
Izingqwele zizohlomula ngo-R75 000 kanti kunemiklomelo econsisa amathe kubasubathi abazokwenza isikhathi sokuya kuma-Olympics kanjalo nabazophula amarekhodi akuleli. Irekhodi labesilisa kuleli liphethwe nguGert Thys okuwu2:06:33, elabesifazane wu-2:25:28 liphethwe nguGerda Steyn. Umengameli we-Athletics South Africa (ASA) uJames Moloi, uthe sebemi ngomumo ukusingatha lo mjaho.
“Nginethemba lokuthi sizobona umjaho osezingeni eliphezulu ngeSonto. Kwabesilisa kuleli nguStephen Mokoka osesenzile isikhathi sokuya kuma-Olympics, uPule Sibeko simbhekile ngoba unesikhathi esihle.
“Kubalulekile ukuba abasubathi babambe iqhaza kulo mjaho ngoba bathola amaphuzu azosiza bona. Kwabesifazane bathathu abasubathi asebezenzile izikhathi nguGerda, u-Irvette van Zyl noCian Oldknow,” kusho uJames.
U-Adam Lipschitz uzokube egijima iHumburg Marathon ngenhloso yokwenza isikhathi sokuya kuma-Olympics. Lo msubathi usanda kwenza isikhathi esiwu2:13 kwi-marathon.
Izinombolo zizoqala ukulandwa namuhla eMsunduzi Athletics, eMgungundlovu, kusasa ngoLwesihlanu nangoMgqibelo zizotholakala eRiverside Hotel, eThekwini.