Ugxilise umqondo ezinhlelweni zeTuks obolekiswe yiDowns 'ehlathini'
UGXILISE umqondo ekulweleni ukunyukela kwiDStv Premiership ne-University of Pretoria umdlali owebolekiswe yiMamelodi Sundowns kule kilabhu esethubeni lokubuyela esigabeni esikhulu.
ITuks izovovana inkani neVenda FC koweMotsepe Foundation Championship (MFC) ngoMgqibelo ngo-15h00 eThohoyandou Stadium, eVenda.
UThabang Sibanyoni (28) ongumgadli ovuthayo weTuks, utshele ILANGA ukuthi uzimisele ngokulwela ukunyuka nale kilabhu ukuya esigabeni esikhulu ngesizini ezayo. Yize lo mdlali ekuqonda ukuthi udlala kwiTuks ngenxa yokwebolekiswa yiSundowns kuze kusongwe isizini kodwa uveze ukuthi umqondo wakhe kawukho kumaSandawana kepha usekufukuleni iTuks.
“Ngiyazi ukuthi ngibolekisiwe kwiTuks kuze kusongwe isizini. Kangifuni ukulobizela izinto eziningi, okubalulekile manje wukufeza izinhloso zekilabhu zokunyukela kwiPremiership ngesizini ezayo. Kangizimisele ngokufaka indaba yeSundowns emqondweni wami.
“Kasikalilahli ithemba yize sesilahle amaphuzu amqoka. Yisikhathi esingesihle kithina esisafikile sokulahla amaphuzu. Konke ngikubeke kuNkulunkulu owaziyo ngekusasa lami. Ngiyafisa ukubuyela kwiPremiership kwazise yindawo efiswa yiwona wonke umdlali.
“Ngifuna nokulwela ukubamba uPrince Nxumalo weJDR Stars ohamba phambili ngamagoli kulesi sigaba sethu njengoba enawu-15. Okuhle wukuthi njengamanje kangikho kude kakhulu kuyena njengoba sengihlohle awu-7. Kuningi okusengenzeka kule midlalo emihlanu esele yeligi,” kusho uSibanyoni osewake wayibamba kwiSuperSport United nakwiSekhukhune United.
* Kuzo ezeMFC, iMilford FC inomdlalo onzima neNB La Masia ngoMgqibelo ekhaya. Lo mdlalo ufana nowamanqamu kwiMilford FC esempini yokuvika izembe.
* Isiyonke imidlalo yeMFC engempelasonto ihlelwe kanje: KUSASA NGOLWESIHLANU
EThohoyandou: Black Leopards vs Orbit College 15h00.
E-TUT Stadium: Pretoria Callies vs Upington City 15h00.
NGOMGQIBELO
EPrincess Magogo: Milford FC vs NB La Masia 15h00.
E-Old Peter Mokaba: Magesi FC vs Maritzburg United 15h00.
E-GWK Stadium: Hungry Lions vs Baroka FC 15h00.
EThohoyandou: Venda FC vs University of Pretoria 15h00. NGESONTO
E-Isak Steyl: Marumo Gallants vs Platinum City Rovers 15h00.
EClive Solomon Mahlangu: Casric Stars vs JDR Stars 15h00.
Kasikalilahli ithemba yize sesilahle amaphuzu amqoka...