YINGWE NENGONYAMA OWENJAMPELA FC NOMSINGA UTD WOKUKHIPHA INKUNZI YASE-KZN
BANEQHOLO lokudlulela emidlalweni kazwelonke yokuhlunga amakilabhu amabili azonyukela kwiMotsepe Foundation Championship (MFC) ngesizini ezayo abadlali beNjampela FC egabe ngesipiliyoni njengoba izobanga igunya lokumela iKwaZulu-Natal kule midlalo noMsinga United.
Umdlalo wokukhipha inkunzi yaKwaZulu-Natal kwiSafa ABC Motsepe League uzokuba ngeSonto ngo-15h00 KwaNgcedomhlophe Stadium, eMandeni. Kulindeleke ukuthi lo mdlalo ubesezingeni eliphezulu njengoba ozonqoba ezobhekisa amabombo e-Upington, eNorthern Cape, ukuyodlala kwekazwelonke.
UTshepo Motsoeneng opheka iNjampela FC, uthe bathembe isipiliyoni sabadlali kulo mdlalo. Uthi okubajabulisa kakhulu wukuthi bayaqala ukuba kulesi simo ngakho bafuna ukuziqophela owabo umlando omuhle.
“Ngikholwa wukuthi abaphathi bekilabhu kufanele bashayelwe ihlombe ngokuhola ngobuqotho. Kasifuni ukubheka indaba yaseUpington okwamanje, sisagxile kulo mqansa esibhekene nawo wokugudluza endleleni uMsinga nginelikhulu ithemba lokunqoba ngoba siyawazi ukuthi uphetheni. Ngeke siyishintshe indlela esidlala ngayo,” kusho uMotsoeneng obambisene noNkululeko Nzama.
Kubadlali ababhekiwe kwiNjampela FC uNqaba Fanele, uMpilo Buthelezi noLungelo Vilane. UMsinga uphethe uNtandoyenkosi Ngubane, uThamsanqa “General” Sangweni ovutha bhe esiswini noLwazi Mgwaba.
UMpumelelo Mpanza ocija uMsinga, uthe bawulungiselele kahle lo mdlalo. Uthe bafuna ukudlala kwiMFC ngesizini ezayo yize kungeke kube lula ukufeza leli phupho labo.
* Icala leDlangezwa Hellenic liyangena kusasa ngoLwesihlanu lokuduba umdlalo ngesikhathi ibhekene noMkhumbane Classic ngeledlule. UMkhumbane ubuhamba phambili ngo-5-0 ngesikhathi izitha ziduba umdlalo.