Isicelo seDowns kubalandeli ngomdlalo weCaf
Ithembisa ukufela enkundleni ukujika umphumela wangeledlule
UMQEQESHI weMamelodi Sundowns uRulani Mokwena wenza isicelo kubalandeli bale kilabhu ngaphambi komdlalo onzima weCaf Champions League.
IDowns izobhekana ne-Esperance Tunis yaseTunisia emlenzeni wesibili we-semi final yeChampions League kusasa ngoLwesihlanu ngo20h00 eLoftus Stadium, ePitoli. Emlenzeni wokuqala obungeledlule eTunisia iSundowns iguqe ngo-1-0.
Iya kulo mdlalo nje, ngoLwesibili ebusuku yehlule ngo-2-1 iSekhukhune United khona eLoftus. Amagoli eDowns ashaywe nguTashreeq Matthews noThapelo Morena, kwathi eleSekhukhune kwaba yiphenathi evalelwe enethini nguChibuike Ohizu.
UMokwena ekhuluma nabezindaba emuva komdlalo, wenze isicelo kubalandeli bale kilabhu njengoba ezakhe zibhekene nomqansa kwi-Esperance.
“Wumdlalo omkhulu lona, ngiyazithoba futhi ngiyazehlisa kubalandeli bethu. Ngiyabacela ukuba baphume ngobuningi babo ukuzoseseka kulo mdlalo omqoka kangaka. YiChampions League lena ngakho-ke siyamdinga umdlali ka-12.
“Sicela beze bazosisiza ngoba sibadinga ukwedlula yonke into kulo mdlalo. Inkundla kufanele igcwale phama, benze isiqiniseko sokuthi bayaziphazamisa izimbangi zethu. Nathi sizokwenza konke okusemandleni ukuthi siyawunqoba umdlalo. Siyabathanda futhi sizobafela kulo mdlalo,” esho.
* Kwenye i-semi final yeChampions League, i-Al Ahly yase-Egypt izogadulisana neTP Mazembe yaseDR Congo emlenzeni wesibili okusasa ngoLwesihlanu ngo-21h00 e-Al Salam Stadium, eCairo okuyikomkhulu leRed Devils. Emlenzeni wokuqala obungeledlule eDR Congo la makilabhu ashayane aze abukana ngo-0-0.