USuthu luzolwela isithunzi lubhekene neChippa eThekwini
BATHEMBISA ukukhokha isikweletu kubalandeli bamaZulu FC abadlali bale kilabhu eqhathwe neChippa United koweDStv Premiership ngoMgqibelo ngo15h00 eMoses Mabhida Stadium, eThekwini.
USuthu lusazikhotha amanxeba njengoba lushaywe luphindelelwa yi-Orlando Pirates eqale yalukhipha kuma-quarter final eNedbank Cup ngo-4-2 eThekwini yaphinda yaluguqisa koweDStv Premiership ngo-1-0 ngeledlule eSoweto.
EThekwini uSuthu lwaguqa emdlalweni owawugcwele phama futhi ludlala ibhola elihle. Lunesilonda sokuphoxa abalandeli balo olulwela ukubesula izinyembezi kulo mdlalo.
UTshepang Moremi (23) ongomunye wabadlali abashibilikayo esiswini soSuthu, uthi okuhle ngalo mdlalo wukuthi bawulungiselele kahle yize bebuqonda kahle ubunzima abazobhekana nabo kuwona njengoba nezitha zabo zingabhenywa muva nje.
“Siyazi ukuthi iChippa ibuye namaphuzu agcwele emdlalweni wayo wokugcina okuzokwenza ukuthi ifike kithina ihambela phezulu. Yingakho nathi kufanele silwe umdlalo uqala uze uyophela. Siwaqalekele wonke amaphuzu, kasisafuni ukuwadedela ikakhulukazi njengoba kuwumdlalo wethu wasekhaya.
“Kubalulekile ukuthi abalandeli singabaphoxi, silwele isithunzi sekilabhu. Sisenalo ithemba lokuqeda sibalwa namakilabhu akwi-top 8.
“Okuhle wukuthi sidlala kahle, yinhlanhla nje kuphela ebuye isilahlekele enkundleni. Ngijabule ngendlela engidlale kahle ngayo kule midlalo edlule. Ngifuna ukuqhubeka ngenze kahle kuyona yonke imidlalo yethu esele.
Bonke abadlali bafuna ukuba yingxenye yokunyomfa izinto zeChippa kulo mdlalo,” esho.
Kubadlali ababhekiwe kulo mdlalo oSuthwini kukhona yena uMoremi, uVeli Mothwa ezintini, uHendrick Ekstein obuyelwe yifomu ngendlela exakile no-Ethan Brooks osanda kubuya ekulimaleni.
KwiChilli Boyz kukhona uBienvenu Eva Nga, uCraig Martin noStanley Nwabali ongunozinti waseNigeria okuvela ukuthi ugaqelwe yi-Orlando Pirates neMamelodi Sundowns kuleli.
Kuthiwa uSiviwe “Chippa” Mpengesi ongumnikazi weChippa angase amdedele iBucs athathe uRichard Ofori waseGhana.