Sizoqondiswa ubugwegwe isilomo sebhokisa saseKZN
UBen 10 ubengekho esikwatini esidlale iMandela African Boxing Cup eThekwini
KULINDELEKE ukuba ajeziswe kanzima uPhiwokuhle “Ben 10” Mnguni ngenxa yokwehluleka ukuziphatha ngendlela efanele ngesikhathi iqembu leSA National Boxing Association (Sanabo) linekhempu ezinyangeni ezedlule.
ILANGA lithole ukuthi izikhulu zale nhlangano eyengamele isibhakela sama-amesha kuleli, zinqume ukuba leli bhokisa lesifazane lingafakwa eqenjini ebelidlala kwiMandela African Boxing Cup edonse isonto lonke e-International Convention Centre (ICC) eThekwini.
Kuthiwa isinqumo sokugabha uMnguni sithathwe ngemuva kokutholakala kobufakazi obuqanda ikhanda bokuthi le ntokazi yaseDundee kayiziphathanga kahle isekhempini kulungiselelwa i-All Africa Games eGhana.
Kulo mqhudelwano omqoka uBen 10 akalwanga kahle kanti kusolwa ukuthi akasawufaki umfutho emalungiselelweni ezimpi njengakuqala.
UBen 10 uzobhekana nolaka lwezikhulu nje, ungomunye wezethenjwa zamabhokisa akuleli uma kukhulunywa ngemiqhudelwano emikhulu. Phela wagila izimanga eqopha umlando eba yibhokisa lokuqala eNingizimu Afrika ukunqoba indondo kumaCommonwealth Games. Kulo mqhudelwano owawuseBirmingham, e-England, uMnguni wabuya nendondo yesiliva ngo-2022.
Lezi zimanga zenza wahlabana ngomklomelo iKZN Sports Woman of the Year neSports Personality of the Year emcimbini wokuklomelisa abezemidlalo baKwaZulu-Natal abenza kahle wango-2022. Wagoduka ngonyanyavu lwemoto entsha ceke ngenxa yamagalelo akhe.
Kuthintwa imenenja yeqembu lesizwe ebelidlala kwiMandela Boxing Cup u-Advocate Lwandiso Gasela, ithe kayivumelekile ukuphawula ngalolu daba.
UBen 10, onqwamane naleli phephandaba eyoseka ozakwabo kwelinye ihhotela eligudle ulwandle, uvumile ukuthi kunephutha alenza. Uthe useyibhalele incwadi iSanabo wacela uxolo. Akathandanga ukwanda ngosuku azobizelwa kulo esigcawini sokuqondisa ubugwegwe.