Kuputshuka eyoqhekeko kubadlali beChiefs
Kuthiwa kabasahloniphani bebodwa kanti umqeqeshi uyehluleka ukubalawula
KUPUTSHUKA indaba yoqhekeko kubadlali beKaizer Chiefs okuthiwa yikhona osekuphendule le kilabhu ukudla kwesibhaxu kulezi zinsuku.
IChiefs izobhekana neSuperSport United koweDStv Premiership ngoMgqibelo ngo-17h30 eFNB Stadium, eSoweto.
IChiefs idonsa kanzima kulezi zinsuku njengoba iphela yinduku. Isanda kuphoxa abalandeli bayo iguqiswa yiRichards Bay FC ngo-1-0 koweligi ngeSonto eMlazi.
ILANGA lihletshelwe ngumthombo walo ongaphakathi kwiChiefs ukuthi esinye sezizathu esiholela ekutheni le kilabhu ibe yisigubhu sezangoma esishaywa yinoma ngubani.
“Abadlali beChiefs kabahloniphani bebodwa osekwenze kwaba noqhekeko, umuntu usezenzela okwakhe. Ungabuza abadlali beBay bangakutshela into abebethethisana yona enkundleni (abadlali beChiefs) umdlalo uqhubeka, ubungaphika ukuthi badlalela ikilabhu eyodwa, kuyazibonakalela ukuthi kabahloniphani.
“Nomqeqeshi wabo uCavin Johnson (osesithombeni) uyehluleka ukubalawula, iChiefs ingaphezulu kwakhe, unomoya ophansi kakhulu, udalwe kanjalo nabadlali sebeze bakubona lokho, yingakho benza kanje.
“Kangimangalanga uma etshela abezindaba emuva komdlalo ukuthi abadlali bakhe bebephikisana kanzima emuva komdlalo ezindlini zo-kushintshela. Ubekho-na kodwa wangasila-wula isimo.
“Okuhle wukuthi nabaphathi bayakubona lokho, yingakho bengakufihlanga ukuthi bathungatha umqeqeshi ozohola le kilabhi ngesizini ezayo. Nakubadlali ngokunjalo lizokhala izembe,” kusho umthombo.
Leli phephandaba libuza uVina Maphosa wezoku-xhumana kwiChiefs ngalolu daba, uthe uma kukhona okwenzakalayo bazomemezela.