Inkcazelo yamaphupha
IPHUPHA: Molo tata, ndiphupha inyama ebomvu etyebileyo, ndiphupha nomngcwabo womntu wasebumelwaneni ophilayo, ndicela undixelele athetha ukuthini la maphupha?
IMPENDULO: Xa uphupha ngenyama kubalulekile ukwazi indawo kwanokuba inyama le ibisenziwani umzekelo - ityiwa, iphekwa okanye isojiwa. Zonke ke ezo nkcukacha ziye zibe luncedo kumhlalutyi. Umngcwabo womntu osaphilayo wona ubonisa impilo kulowo ungcwatywayo, ingakumbi xa engumntu onempilo enkenenkene.
IPHUPHA: Camagu tata, ndicela undilawulele eli phupha. Ndisoloko ndiphupha ndihleli nomakhulu wam ongasekhoyo. De ndathatha isigqibo sokutyelela idlaka lakhe, nangona nje ekhaya bengawenzi amasiko. Kodwa emveni koba ndibuyile andikaphinde ndilifumane elo phupha.
IMPENDULO: Lihle inyathelo olenzileyo kodwa alanelanga kusafuneka wenze ngaphezu kokuba wenzile, umkhumbule umakhulu lowo ngokwesintu.
IPHUPHA: Ndicela ukubuza xa uphupha umama wakho engenamilenze?
IMPENDULO: Elo phupha lichaza impilo eza kuba nkenenkene kulowo usephupheni.
IPHUPHA: Ndiphupha isifihlo sesizalwane nje sethu, ingaba lithini? Camagu!
IMPENDULO: Alixhalabisi eli phupha kuba lichaza okuhle nempilo ende kwisizalwane eso.
IPHUPHA: Ndiphupha ndisesikolweni kodwa ndifike kumabanga aphantsi abafundi behleli bejonge kumfundisintsapho, kubekh’obuza amabanga aphezulu (Grade11) akhonjwe phambili kwamanye amagumbi, nam ndilandele kuba ndithi ndifuna kanye loo klasi, into endixakayo le ndawo ivela okwesibini ndifunana nale klasi, kodwa kwelokuqala ibe inguGrade 9.
IMPENDULO: Iphupha elinje lichaza inyathelo elitsha ekufuneka ulithathile ebomini, amaxesha amaninzi oku kubhekisele ekubeni wamkele ubugqirha okanye uvume intwaso.
IPHUPHA: Kuxa kutheni xa uphuphe uleqwa ziinyosi?
IMPENDULO: Kaloku iinyosi zizihlwele zakowenu ezo. Xa uphupha zikuleqa sukuba nawe ungazenzi izinto zakowenu okanye ubaleka amasiko nezithethe zakho.
IPHUPHA: Camagu, ndingumphuphi ophupha kwenzeke. Ndinexhala, ndiphuphe ndifikelwa yileta ndisesikolweni, ithetha ngomamam ongaphilanga kakhulu. Angasweleka nanini, xa ndifika ekhayeni azalelwe kulo elaliswe esiphontshini kunzima, kodwa sesezantsi sezokugqitha. Ndibaleke ndiyokucoca kwezinye izindlu kwalapha. Naye ndimshiya evaswa ngomnye umama endingamazanga ukuze imoto yomzi wabangcwabi ifike. Nezo zindlu bendizicoca azisekho. Abezanga nabanye abantu abazalana nomama, ithini le nto ngoba unawo nomzi wakhe, kwaye akandifuni nokundibona.
IMPENDULO: Lungisa le nto ibangela ukuba ningavani ukuze kuzokulunga kuwe, kwaye uze wazi ukuba nokuba imeko ithini wena uyakuhlala ungumntwana kuye, ngoko ke zithobe nokuba ayinguwe ophazamileyo.
IPHUPHA: Molo tata, namhlanje ndiphuphe elinye ixhego lalapha ekhaya kodwa lasweleka, ingathi sisemanzini, emvuleni, emlanjeni, utamkhulu ebenxibe into ebuboya apha entloko, ingathi bendinxibe iintsimbi ezimbini, emhlophe neluhlaza. Apha kwam kukho ubuhlanti, erumini yam kukho amagqirha, ingathi kugcwele ndiye ndothuka xa utamkhulu endifaka emanzini, ndicela ukubuza tata lithetha ntoni?
IMPENDULO: Vuma ukufa okumhlophe, kuba uzalwa ngabantu abanjalo kakade.
IPHUPHA: Ndiphupha ndileqwa ngabafana abaninzi bendoxuthela impahla esebhakeni, ngathi abade bandincame qho xa ndizama ukusithela kubo bavela kufuphi, ndicela impendulo.
IMPENDULO: Khawuzame ujonge abantu abakungqongileyo kuba kuyacaca ukuba asinguye wonke umntu ongumhlobo kuwe, ongumhlobo wenene. UMphilisi uyafumaneka nakuFacebook, khangela uMphilisi The Healer apho okanye usithumelele iphupha lakho
kuWhatsapp: 063 743 9538