UVumenjani ufuna iindebe ezimbini kwiDowns yakhe
NAKUBENI iMamelodi Sundowns ingayiqalanga kakuhle isizini entsha – kodwa umlandeli wayo, uNondima Vumenjani, uthi iqela lakhe linalo ithuba lokuphumelela iindebe ezimbini phambi kokusongwa kwesizini.
Lo mlandeli weSundowns uzityande igila kwincoko abe nayo neli phephandaba kutshanje.
NONDWE TYILO: Leliphi iqela olilandelayo kwiPSL?
NONDIMA VUMENJANI: Iqela endililandelayo yiMamelodi Sundowns, umdlali endimthandayo nguPiyani Mabunda noDavid Kekana.
NT: Uqale nini ukulandela eli qela lakho kwaye watsalwa yintoni kulo?
NV: Ndiqale emva konyaka ka2000. Ndandingumlandeli woMtata Bush Bucks, emva kokuthotyiselwa kwayo ndaye ndalandela iMamelodi Sundowns.
NT: Uzive njani emva kokuba iDowns ibambene naMazulu ngempelaveki?
NV: Bendilindele ukuba baphumelele, ngelishwa badlale ngokulingana. Bekungekho lula, AmaZulu ebequqa equqile ebhokisini kuba besidlalela endaweni yawo. Ndixolile ziziphumo zomdlalo.
NT: Yintoni oyinqwenelayo kwiqela lakho emva kokuba liphume kwiChamps League?
NV: Eyona nto endibanqwenelela yona kukuba bagxile ekukhuseleni indebe yePSL ngoku nanjengoko bezintshatsheli zesizini ephelileyo. Bazame ukuthatha iNedbank Cup kunye neTelkom Cup.
NT: Xa ujongile, ningayikhusela le ndebe yePSL?
NV: Asekhona amathuba kwaye maninzi. Xa ungajonga kwisizini edlulileyo, besibethiwe kwimidlalo emine. Kule sizini asikabethwa, sidlale ntanganye kwimidlalo ethile. Ithi lo nto kuse kutsha ukuba singalahla ithemba kwaye sineqela elomeleleyo nabadlali abaselula abazimiseleyo. Phambili Mellow Yellow!!