Benza iziqwenga aBanyana Banyana kwiCosafa
IQELA lesizwe lamantombazana adlala ibhola eMzantsi Afrika, lenza iziqwenga kwitumente ekuthiwa yiCosafa esingathwe yidolophu yaseBhayi. Emva kwemidlalo emithathu ukuzothi ga ngoku, iBanyana Banyana iphumelele imidlalo emithathu.
Ekuqaleni kwale veki, uMzantsi Afrika ubethele oogqirha nezicaka iMalawi ngamagowuli amathandathu eqandeni (6-0) kumdlalo weCosafa obubanjelwe eWolfson Stadium.
Ngaphambili, iBanyana Banyana ibethe iMadagasca ngo’2-1 neBotswana ngo’1-0. Emva kwaleyo imidlalo umqeqeshi weBanyana, uDesiree Ellis, ebengonelisekanga kwaphela – kodwa emva kokuba iqela lakhe liphumelele ngemvula yamagowuli, ngokuqinisekileyo – uya kumdlalo olandelayo ukuzithemba kufunqukile.
Ngoku iBanyana iza kudibana nelizwe laseUganda kumdlalo weCosafa ophambi kowokugqibela eWolfson Stadium.
Umdlali ozibaluleyo kumdlalo ogqithileyo nguLinda Motlhalo ofake amagowuli amathathu eyedwa.
Amanye amathathu afakwe nguKhanya Xeshi (amabini) noKgaelebane obuye nelinye. Komnye umdlalo iNamibia ivuthulule ilizwe lasebumelwaneni, Eswatini, ngamagowuli amane kwelinye (4-1) eWolfson Stadium. Kwangaxeshanye, uKapteni weBanyana Banyana, uJanine Van Wyk, ubhiyozele umdlalo wakhe wekhulu namashumi amahlanu emidlalo kwiqela lesizwe.
Lo nto ithetha ukuthi ungoyena mdlali kweli lizwe odlale imidlalo emininzi ngaphezulu kwabo bonke abadlali kwiBanyana Banyana.
Le tumente yeCosafa ikwasetyenziswa njengeqonga lokuphakamisa umsebenzi omhle woluntu owenziwe ngoomama abafana negqala lomzabalazo uAlbertina Sisulu.
“Kuyasivuyisa ukusebenzisa iitumente ezifana nale njengendawo esinokubhiyozela kuyo ubomi bukaMama uSisulu owazinikelayo ukuze kukhululeke abantu. Siwabonile amabhinqa esenza ezibukwayo ebholeni kwihlabathi – kodwa ndicinga ukuba sihamba phambili thina kwicala lokubanika amathuba kwingingqi esemazantsi weAfrika nakwiAfrika ngokubanzi,” utshilo usosiba weCosafa, uSue Destombes.