Sekumenele owayelingisa Emzini Wezinsizwa
UBESEGULE isikhathi eside owayengumlingisi womdlalo wamahlaya waku-SABC1, Emzini Wezinsizwa, uWashington Sixolo, oshone esibhedlela iChris Hani Baragwanath, ngeSonto ekuseni.
USixolo (83) wayedlala indawo kaJwara.
Indondana kamufi, uThamsanqa Sixolo, ithe uyise ubesehleli ekhaya ngoba ugule iminyaka engaphezulu kweyisikhombisa. “Ubenakekelwa wumama.”
Yize engadalulanga ukuthi uyise ubephethwe yini kodwa uthe ngeledlule ukugula kumqinisile. “NgoMgqibelo sithintwe wodokotela kunzima kakhulu. NgeSonto ekuseni ngabo-11 usishiyile.”
Uthe uyise udlale emidlalweni eminingi ngaphandle koMuzi Wezinsizwa.
“Waqala kudala ecula ibhesi kwiKings Messengers, waphinde wadlala nemidlalo yomoya emsakazweni. Udlale emdlalweni uSenzekile edlala indawo kaJackson owayejola nentombazane eyayivela eMtubatuba.”
Uthe udlale nakuVelaphi engunogada. Umchaze njengomuntu obenothando waveza ukuthi nabo balufunde kukhulu kuyena ngothando.
“Aziziningi izingane ezingasho kanjalo. Ubaba ubenothando futhi ethanda ukuthi kube nenjabulo lapho ekhona. Ubethanda unkosikazi wakhe, izingane zakhe nabazukulu.”
Uthe ubewumuntu womphakathi futhi ejwayele ukupha izingane oncamnce.
Inkonzo yesikhumbuzo izoba kusasa e-Uncle Toms Hall e-Orlando West, eSoweto, ngo-2 ntambama.
Inkonzo yomngcwabo izoba seSeventh Day Adventist Church e-Orlando West, ngeSonto kusukela ngo-7 ekuseni kuya ku-11.
UThamsanqa uthe ushiye emhlabeni unkosikazi uCynthia Sixolo, izingane ezintathu uThamsanqa, Zolani noLindelwa nabazukulu abaningi.