Kusolwa nephoyisa etulweni lokusoconga
LIBUYELA namuhla enkantolo iphoyisa elibhekene necala lokuhlela itulo lokusoconga umfowabo wenkosi ongumbhishobhi kwenye yezindawo eziseNyakatho neKwaZulu-Natal.
Leli phoyisa liboshwe nomfowabo nosibali walo okuthiwa labanjwa nabo behamba ngemoto iToyota Fortuner ngoLwesihlanu olwedlule sebebuya kozama ukusoconga lo mfundisi ophinde abe nguthisha. Abasolwa kuthiwa baboshwa behlome ngezibhamu ezincane bengakujantshi wesitimela eMfekayi.
Umthombo weSolezwe ongashayi eceleni uveze ukuthi ngoLwesihlanu kunabantu ababepake imoto ngaphandle komuzi kamfowabo wenkosi kodwa bangehla emotweni. Kuthiwa imoto yama ngaphandle komuzi kodwa yagcina ngokuhamba ngoba bebona amalungu omphakathi esondela ngakuyo.
Kuthiwa laba basolwa bazithela phezu kwesivimbamgwaqo, imoto yabo yamiswa.
Iphoyisa kuthiwa laveza isigqebhezana esikhombisayo ukuthi lingumuntu womthetho kodwa amaphoyisa aqhubeka nokusesha imoto.
“Abasolwa babanjwa behamba ngeToyota Fortuner efana neyenkosi yesizwe kanti umsolwa oyedwa wabaleka ngesikhathi amaphoyisa esamise imoto kodwa amjaha ambamba esengene esikhotheni. Umsolwa wesibili utholwe nesibhamu esifihle ngaphansi komata osesihlalweni esiseduze kwesomshayeli.
“Umshayeli wemoto naye watholwa nesibhamu kodwa wathi sisemthethweni. Kuvele nokuthi iphoyisa lihlobene nondlunkulu naye oyiphoyisa okuthiwa baveze ukuthi bebethunywe nguye ukuba bayobulala umfowabo wenkosi,” kusho umthombo othe abasolwa bahluleka wukusoconga umfowabo wenkosi ngoba akazange aphume ngesikhathi ajwayele ukuya ngaso esikoleni kodwa walibaziseka.
Umfowabo wenkosi uthe ngeke aphawule ngalolu daba ngoba selusezandleni zabomthetho.
Kuthintwa inkosi ibuze ukuthi ngabe ngubani otshele izintatheli lolu daba.
“Wena ungishayela ucingo ungibuza izindaba, kungani ungabuzi inombolo kankosikazi? Angidingi ukwazi ukuthi ukuphi, wena uma udinga inombolo yomkami kufanele ufune yona hhayi ukuthi ungibuze izindaba zokusocongwa kwabantu. Tshela loyo okunikeze udaba akunike inombolo kankosikazi,” kubhoka inkosi ngolaka.
Imizamo yokuthola uNdlunkulu ayiphumelelanga njengoba ucingo lwakhe belukhala lungabanjwa, akayiphendulanga ne-SMS athunyelelwe yona.
UCaptain Nqobile Gwala wamaphoyisa KwaZulu-Natal ukuqinisekisile ukuthi kuboshwe amadoda amathathu nezibhamu ezingekho emthethweni akade elandelwa ngamaphoyisa ophiko lwezobunhloli.
Uthe abasolwa babhekene necala lokuphatha izibhamu ezingekho emthethweni nezinhlamvu kanti athweswe necala lokuhlela itulo lokubulala.
Abasolwa babingelele iMantshi yaKwaMsane ngoLwesihlanu kanti bazobuyela enkantolo namuhla.
Ibamba likaKhomishana wamaphoyisa KwaZulu-Natal, uMajor General Bheki Langa lithe izibhamu ezitholwe kubasolwa zizoya kohlolwa ukuze kubhekwe kahle ukuthi ngabe azithinteki yini kwamanye amacala obugebengu.