IMeya entsha ye-IFP ibonge uNyazilwezulu
IBONGE umholi webandla lakwaShembe eBuhleni uMduduzi “Nyazilwezulu” Shembe, iMeya entsha yoMkhandlu waseNquthu, uMnuz Siyabonga Mabilabila Kunene ngemuva kokugcotshwa ngokusemthethweni, izolo.
UKunene oyiMeya ye-IFP ubeyingxenye yamakhansela kaMasipala waseNquthu agcotshwe izolo emhlanganweni womkhandlu ngemuva kokhetho lokuchibiyela obelungoMeyi 24, olunqotshwe i-IFP iqumba phansi i-ANC. Ukhethwe ngo-elethu. Ekhuluma nabezindaba ngemuva kokugcotshwa, uKunene uphinde wabonga neqembu lakhe ngokumethemba ngalo msebenzi wobuMeya.
“Ngibonga uNkulunkulu engimkhonzayo uNyazilwezulu ngokuhamba nami kuze kube lapha,” kusho uKunene, wathembisa ukuthi uzokwenza konke okushiwo abantu neqembu lakhe.
Uthe into yokuqala azoyilungisa indaba yamanzi ahlalise lubhojozi umphakathi waseNquthu.
“Ukuhanjiswa kwamanzi kubantu kusingethwe kuMkhandlu oMkhulu uMzinyathi kodwa ngizocela khona ukuthi basakhele ithangi elikhulu elizobhekelela iNquthu ukuze amanzi engeke ashode,” kusho uKunene.
Uthe zikhona ezinye izidingo umphakathi ozifunayo ngaphandle kwamanzi kubalwa nokufakelwa ugesi kwezinye izindawo.
UKunene uthe bazokwenza uphenyo emkhandlwini ngenhloso yokuthola kabanzi ukuthi izimali zomkhandlu bezisetshenziswa kanjani yisigungu esiphumile.
“Uma uyinono ufika endlini entsha ushanele ukuze ungagcini usulala nezinyoka,” kuqhuba uKunene. UKunene uthe abantu baseNquthu bakhethe kahle baqoka imeya eyikholwa.
“NgiyiNazaretha abantu ngizobaphatha ngendlela efanayo noma ngabe kuthiwa abasiyo inhlangano yami, ngiyathembisa ukuthi ngeke kuze kube khona ukukhetha iphela emasini uma kuziwa ekuhanjisweni kwezidingo,” kusho uKunene.
Mayelana nodaba lokuboshwa kwabo, uKunene uthe inhloso yezimbangi zabo bekuwukuthi babhadle ezitokisini baze baphume sekuze kwadlula ngisho ukhetho kodwa lokho kwangenzeka.
“Akekho obengaboni ukuthi iNkatha iza kabi ngaphambi kokhetho yingakho kuze kwakhandwa leli cala kwathiwa sibophe itulo lokubulala,” kusho uKunene.
UKunene, iPhini lakhe uNkk Nothile Zungu namanye amalungu amane e-IFP bangaphandle ngebheyili ka-R7000 umuntu emunye ngemuva kokuboshwa oKlebe ngo-Ephreli mayelana necala lokubopha itulo lukusoconga ilungu le-ANC.
UKunene uthe uyazi ukuthi izitha zabo zizoqhubeka nokubacathamela. “Nesisho sesiZulu siyasho ukuthi alikho isoka lahlala nentombi ngokukhululeka imbangi ikhala,” kuphetha uKunele.