Kumashe abamukela izingcingo u-10111
KUPHAZAMISEKE ukusebenza ezikhungweni zokuphendulwa kwezingcingo zabacela usizo oluphuthumayo zakwaSAPS, u-10111 ezifundazweni ezehlukene zakuleli, abasebenzi bemasha befuna ukunyuselwa imiholo, izolo.
Abasebenzi abebemasha eThekwini, bathule uhlu lwezikhalo ekomkhulu lamaphoyisa esifundazweni. Bafuna uhulumeni abuyekeze udaba lwamaholo abo, bakhala ngokuthi imiholo yabo mincane uma kuqhathaniswa nabanye ozakwabo abenza umsebenzi ofanayo bakweminye iminyango kahulumeni kuleli. Bakhala ngokunganakwa kombiko wethimba eliyisipesheli elajutshwa ngo2013 ukuthi libheke ukusebenza kwalezi zikhungo. Ngemuva kokuphothula ukusebenza kwalo ngoEphreli nyakenye kuthiwa leli thimba laphakamisa ukuthi laba basebenzi bafakwe ngaphansi kwesigaba samaholo uLevel 7.
UMnuz August Mbhele ongumdidiyeli weSouth African Federation of Trade Unions (Saftu) KwaZulu-Natal uthe: “Sifuna imisebenzi ephilisayo ngoba nathi singabazali sondla imindeni. Njengabavoti sifuna impilo engcono.”
Laba basebenzi bakhala ngokuthi umnyango wamaphoyisa usuyaziziba iziphakamiso ezenziwa yithimba eliyisipesheli. Bafuna ukuthi bakhushulelwe amaholo bese bekhokhelwa nemali yokuwakhuphula kusukela ngo-2013 ngesikhathi kuqokwa ithimba ebeliphenya.
Okhulumela uNgqongqoshe wamaPhoyisa kuzwelonke, uMnuz Vuyo Mhaga uthe ukusebenza kuphazamisekile ezindaweni eziningi ngenxa yale mashi.
“Sisasezingxoxweni zokuthi abasebenzi bezikhungo eziphendula izingcingo bangene ngaphansi kwamaphoyisa ukuze imisebenzi yabo ithathwe njengebucayi ukuze bangakwazi ukuba namamashi azophazamisa ukusebenza. Incwadi yezethulo isifikile ehhovisi likaNgqongqoshe, ihhovisi lisacubungula izikhalo zalaba basebenzi,” kusho uMhaga.
Uthe izifundazwe ezithintekile obekuqhubeka kuzo lawa mamashi yiKwaZulu-Natal, Eastern Cape, Western Cape naseGauteng.
Mayelana nokungalingani kwemiholo, okhulumela uMnyango wezaBasebenzi baHulumeni nokuPhatha uMnuz Dumisani Nkwamba uthe eminye imiholo yabasebenza ezikhungweni zokuphendula izingcingo inqunywa ehhovisi likangqongqoshe osuke ephethe umnyango.
Abasebenzi banike uMnyango wezamaPhoyisa umnqamulajuqu wamasonto amabili ukuthi uphendule kulezi zikhalo. Bekumasha abasebenzi abangamalungu enyunyana yamaphoyisa iSouth Africn Police Union (Sapu).
Khonamanjalo, inyunyana iPolice and Prisons Civil Rights Union,(POPCRU) ithumele isitatimende esigxeka abasebenzi abebemasha. Okhulumela le nyunyana, uMnuz Richard Mamabolo unxuse amalungu abo ukuthi angazibandakanyi nemashi, wathi igqugquzelwa osomathuba abafuna ukufeza izinhloso zabo. Uveze ukuthi udaba lwemiholo yabasebenzi luvele luyadingidwa.