‘Umnotho ulengela kwinzikamnotho’
UMNOTHO waseNingizimu Afrika ulengela kwinzikamnotho (technical recession) emuva kokuthi abakwaStats SA beveze ukuthi umnotho awukhuli ngendlela elindelekile.
Isazi somnotho, uSolwazi Bonke Dumisa, sithe umnotho ukhula kancane kusukela ngonyaka odlule.
“Kwikota yokugcina umnotho ukhule ngo-0.3% kanti kwikota yokuqala yalo nyaka ukhule ngo-0.7%. Ukungakhuli kahle komnotho amakota amabili elandelana yikhona okwenze sazithola sikulesi simo. Ngabe lokhu kusho ukuthini kubantu? Kusho ukuthi asibophe izifociya kodwa akusho ukuthi masithuke noma sisabe ngoba izikhungo zethu nemithetho isebenza kahle. Umnotho awukakaziki futhi ngeke uzike okwamanje,” kusho uDumisa.
UMnuz Jason Muscat, isazi somnotho sakwaFNB usihe umnotho awukhuli kahle ngenxa yezingqinamba kwezolimo, ezokwakha, izimayini nasemikhiqizweni yamafemu.
Ugqugquzele abantu ukuthi babophe izifociya ngoba isimo singase sibe nzima uma umnotho uqhubeka nokungakhuli. “Abantu abonge imali abanayo, baqhubeke nokuthenga abakudingayo hhayi ukukhithiza izinto ezingenasidingo. Sibona abantu bengazikhithizi izimpahla zokugqoka okusho ukuthi bafundisekile ngokusebenzisa imali. Sikhathazekile ukuthi uma umnotho usuqala ukusimama kuvele kushintshwe ongqongqoshe, abatshalizimali baqale ukuhoxisa imali yabo,” kusho uMuscat.
Uthe okulunguzise iNingizimu Afrika kwinzikamnotho wukukleliswa kwayo njengezwe elingathembekile kubatshalizimali nokushintshwashintshwa kongqongqoshe.
Izinga labaswele umsebenzi linyuke lafinyelela ku-27.7% kwikota yokuqala ka-2017 kanti bakhathazekile bengosomnotho ngalokhu.